Pagdili
Kining pulonga gigamit sa pipila ka modernong mga hubad (JB, NE, NW) sa paghubad sa Hebreohanong pulong nga cheʹrem, nga gihubad usab diha sa Bag-ong Kalibotang Hubad ingong “butang nga gikatugyan sa kalaglagan.” Ang Hebreohanong pulong nagtumong sa usa ka butang nga dili na mabawi ug matubos nga gikatugyan o gipahinungod ngadto sa Diyos ug busa gipinig alang sa sagradong paggamit, apan kini sagad kaayong gigamit maylabot sa mga butang nga gipinig alang sa bug-os nga kalaglagan. Kini mahimong mapadapat sa usa ka tawo. (Ex 22:20; ang JB dinhi mabasa: “Ang bisan kinsa nga maghalad ngadto sa ubang mga diyos mailalom gayod sa pagdili [“igatugyan ngadto sa kalaglagan,” NW]”; Lev 27:29) O kini mahimong mapadapat sa iyang mga kabtangan (Esd 10:8); sa usa ka hayop, sa usa ka yuta, o sa bisan unsang butang nga gipahinungod alang sa sagradong paggamit (Lev 27:21, 28); o sa tibuok siyudad ug sa tanang butang nga anaa niana.—Deu 13:15-17; Jos 6:17.
Ang sagradong mga pagdili o pagpinig gihisgotan diha sa pipila ka tagna. (Miq 4:13; Zac 14:11) Alang sa kompletong paghisgot bahin niini, tan-awa ang GIPAHINUNGOD NGA BUTANG.