Ang paagi sa pagtangtang sa lugas gikan sa lindog ug sa tahop niini. Kon diyutay ra ang giokon sa mga manghahagdaw, o kon ang lugas gagmay sama sa cumino, o kon ang paggiok himoon sa tago tungod sa peligrosong mga panahon, ang usa ka pudlos o pangdagpas ang gamiton aron giokon ang lugas pinaagi sa kamot, diha sa yuta o kaha sa usa ka pug-anan sa bino.​—Huk 6:11; Ru 2:17; Isa 28:27.

Apan, ang naandang mga buluhaton sa paggiok himoon diha sa giokanan. Sagad nahimutang sa mas habog nga lugar nga apupa sa hangin, kini maoy usa ka lapad ug linginong luna nga moabot sa 15 m (50 p) ang diyametro, nga gama sa bato o kaha sa gipabantok nga yuta. Ang publikong mga giokanan sagad makaplagan sa usa ka lugar lamang nga duol sa usa ka balangay ug mahimong gamiton sa tanan. Ang mga binangan nga sebada o trigo, ang pangunang mga lugas sa Palestina, ikatag diha sa giokanan (karong adlawa ang mga binangan sagad ikatag sa gibag-on nga 30 ngadto sa 46 sm [12 ngadto sa 18 pul.]). Ang pagtamaktamak niini pinaagi sa mga torong baka o sa ubang mga hayop, samtang padayon kining molibotlibot diha sa giokanan, anam-anam nga magdugmok sa mga uhot ug magtangtang sa lugas gikan sa tahop. Ang mga hayop dili busalan samtang nagagiok sa lugas.​—Deu 25:4; Os 10:11; 1Co 9:​9, 10.

 Ang mga galamiton sa paggiok nga guyoron sa mga hayop magpadali sa paggiok ug kini mas makagiok kay sa mga tiil lamang sa mga hayop. (Isa 41:15; Am 1:3) Ang mga panggiok nga gigamit sa mas ulahing kapanahonan maoy halapad, bug-at nga mga balsa nga may hait nga mga ngipon-ngipon nga bato o puthaw diha sa ilalom niini o kaha mga bayanan nga magguyod ug bug-at, pormag-silindro nga mga pangligis nga gitaoran ug mga sulab aron sa pagputolputol ug sa pagdugmok sa mga lindog sa lugas. Sa matag pagtuyok sa maong mga balsa ug mga pangligis, mas lapad nga luna ang magiokan, ug ang kabug-at usab sa nagsakay niini dugang makagiok pag-ayo sa mga lugas.​—Itandi ang Isa 28:28.

Human magiok sa bug-os ang mga lugas, ug maukay sa makadaghan, kini paliran.​—Tan-awa ang PAGPALID.

Tungod kay kini hawan, patag nga luna, ang mga giokanan sagad gigamit sa ubang mga katuyoan. Ang mga seremonyas sa pagbangotan alang kang Jacob gihimo didto sa giokanan ni Atad duol sa Jordan. (Gen 50:​10, 11) Kay gisugo ni Jehova, gipalit ni David ang giokanan ni Arauna (Ornan), gitukod didto ang usa ka halaran, ug naghalad ngadto kang Jehova. (2Sa 24:16-25; 1Cr 21:15-28) Sa ulahi kini nga giokanan nahimong dapit sa templo ni Solomon. (2Cr 3:1) Sa dihang si Jehosapat ug Ahab nagkonsultahanay sa pagpakiggubat batok sa Sirya, ang ilang mga trono gipahimutang didto sa usa ka giokanan sa pagsulod sa ganghaan sa Samaria.​—1Ha 22:10.

Mahulagwayong Paggamit. Sa usa ka mahulagwayong diwa, ang paggiok sa mga lindog sa lugas diha sa giokanan maoy usa ka haom kaayong simbolo kon sa unsang paagi dugmokon ug putolputolon ni Jehova ang iyang mga kaaway. (Isa 41:15; Jer 51:33; Miq 4:​12, 13; Hab 3:12) Ang paggiok nag-ilustrar usab sa pagdaogdaog nga buhaton usahay sa mga tawo ngadto sa uban. (2Ha 13:7) O ang pagbulag sa trigo gikan sa tahop mahimong maghulagway sa pagbulag sa matarong gikan sa daotan pinaagi sa paghukom ni Jehova. (Mat 3:12) Sa lain pang diwa, ang dugay ug dagayang paggiok nagpasabot sa kauswagan ug panalangin ni Jehova.​—Lev 26:5; Joe 2:24.