Usa ka komon nga ilhanan sa kasubo taliwala sa mga Hudiyo, maingon man taliwala sa ubang mga taga-Sidlakan, ilabina sa dihang mahibaloan ang pagkamatay sa usa ka suod nga paryente. Sa daghang kahimtang kini maoy paggisi lamang sa atubangang bahin sa besti aron makita ang dughan, busa dili gayod bug-os nga paggisi sa besti nga tungod niana dili na kini ikasul-ob.

Ang unang pananglitan nga narekord sa Bibliya maylabot niini nga batasan mao ang gihimo ni Ruben, ang kamagulangang anak nga lalaki ni Jacob, kinsa naggisi sa iyang mga besti tungod kay sa iyang pagbalik wala na niya makita si Jose sulod sa gahong-sa-tubig, ug siya nakaingon: “Wala na ang bata! Ug ako​—asa man gayod ako mopaingon?” Ingong panganay, si Ruben ang adunay pangunang responsibilidad sa iyang manghod. Ang iyang amahan nga si Jacob sa dihang gipahibalo sa gituohang pagkamatay sa iyang anak nga lalaki naggisi usab sa iyang mga kupo ug nagsul-ob ug sakong panapton tungod sa pagbangotan (Gen 37:​29, 30, 34), ug didto sa Ehipto gipakita sa mga igsoon ni Jose sa amahan ang ilang kaguol pinaagi sa paggisi sa ilang mga besti sa dihang si Benjamin gipasanginlan nga nangawat.​—Gen 44:13.

Sa kasukwahi, sa dihang ang duha ka magulang nga anak nga lalaki ni Aaron, si Nadab ug Abihu, gilaglag ni Jehova tungod sa ilang daotang buhat, gisugo ni Moises ang ilang amahan nga si Aaron ug ang duha ka nahibiling mga anak nga lalaki: “Ayaw ninyo pasagding magkalkag ang buhok sa inyong mga ulo, ug dili ninyo gision ang inyong mga besti, aron dili kamo mamatay.” (Lev 10:6) Hinunoa, sa ubang mga higayon ang mga saserdote sa linya ni Aaron gitugotan sa pagpasundayag sa maong ilhanan sa kasubo sa dihang mamatay ang suod nga mga paryente, apan ang hataas nga saserdote wala tugoti nga pasagdang magkalkag ang iyang buhok o gision ang iyang mga besti.​—Lev 21:1-4, 10, 11.

Daghang uban pang mga pananglitan sa maong pagpahayag sa kasubo ang gihisgotan: ang kang Job, kinsa migisi sa iyang kupo nga walay bukton sa dihang gipahibalo kaniya ang kamatayon sa iyang mga anak (Job 1:20); ang iyang tulo ka nagpakaaron-ingnong mga higala kinsa, sa dihang ilang unang nakita siya sa iyang masakitong kahimtang, nagpakaaron-ingnong nasubo pinaagi sa pagdanguyngoy, sa paggisi sa ilang mga besti, ug sa pagsaliyab ug abog ngadto sa hangin (Job 2:12); si Josue, human mapildi didto sa Ai (Jos 7:6); ang batan-ong lalaki nga nagpahibalo sa kamatayon ni Haring Saul (2Sa 1:2); si David, sa dihang bakak nga gipahibalo bahin sa pagpatay ni Absalom sa tanan niyang ubang mga anak nga lalaki (2Sa 13:​30, 31); ug si Haring Ezequias ug ang iyang mga alagad kinsa naggisi sa ilang mga besti sa dihang ilang nadungog ang mga pulong nga gisulti ni Rabsake nga Asiryanhon batok kang Jehova ug sa Jerusalem (Isa 37:1; 36:22). Si Rayna Atalia, sa dihang nakita nga ang iyang pag-ilog sa trono matapos na, ‘migisi usab sa iyang mga besti ug misinggit: “Panagkunsabo! Panagkunsabo!”’​—2Ha 11:14.

 Sa hinapos sa kasaysayan sa gingharian sa Juda, ang matig-a nga kasingkasing ni Haring Jehoiakim ug sa iyang mga prinsipe gikubalan na tungod kay sa dihang gibasa ngadto kanila ang tagna ni Jeremias nga nagpasidaan sa mga paghukom ni Jehova, sila wala malisang ug wala “manggisi sa ilang mga besti.”​—Jer 36:24.

Hinunoa, aron ipakita nga kining panggawas nga pagpasundayag sa kasubo lagmit sinalingkapaw o kaha dili sinsero ug nga kini walay bili gawas kon tiunay ang kasubo sa usa ka tawo, si Jehova namulong ngadto sa katawhan sa Juda pinaagi sa iyang manalagna nga si Joel ug miingon kanila: “Gisia ang inyong kasingkasing, ug dili ang inyong mga besti; ug balik kang Jehova nga inyong Diyos.”​—Joe 2:13.

Sa ulahi, ang Hataas nga Saserdoteng si Caifas nagpakaaron-ingong nagpasundayag ug hilabihang kalagot ug kapungot pinaagi sa paggisi sa iyang mga besti tungod sa pag-angkon ni Jesus nga siya mao ang Anak sa Diyos. (Mat 26:65) Sa kasukwahi, si Pablo ug Bernabe, ingong Kristohanong mga sumusunod ni Jesus, nagpakitag sinserong kabalaka ug kaguol pinaagi sa paggisi sa ilang panggawas nga mga besti sa dihang ilang nakita nga ang katawhan sa Listra hapit nang mosimba kanila ingong mga diyos.​—Buh 14:8-18.

Ang Balaod naglatid nga ang usa ka sanlahon kinahanglang magsul-ob ug gision nga besti (Lev 13:45), tingali tungod kay ang sanla gilangkit sa mga Hebreohanon sa kamatayon, ug kini gipakita diha sa mga asoy sama sa paghisgot kang Miriam ingong “samag patay” human tapti niining makalilisang nga sakit. (Num 12:12) Busa ang sanlahon giobligar sa pagsul-ob ug lahing matang sa sapot, sa ingon nagbangotan sa iyang kaugalingon ingong lakip sa ‘buhing mga patay.’

Simbolikong Paggamit. Usahay ang sapot gision usab aron magsilbing simbolo, sama sa dihang gigisi ni manalagnang Ahias sa 12 ka piraso ang iyang besti nga gisul-ob ug giingnan si Jeroboam nga kuhaon ang 10 niini, sa ingon naghulagway sa pagkabahin sa gingharian ni Solomon. (1Ha 11:​29-39) Sa susama gihulagway ni Samuel ang pagsalikway ni Jehova sa balay ni Saul pinaagi sa iyang paghisgot sa kupo nga walay bukton ni Samuel nga nagisi sa dihang gihawiran ni Saul.​—1Sa 15:26-28.