Inay ituslob sa usa ka sudlanan nga puno sa tubig, sa karaang kapanahonan ang mga kamot sagad hugasan pinaagi sa pagbubo ug tubig nganha niini. Dayon ang hugaw nga tubig masawod sa usa ka sudlanan o palanggana diin gipatungod ang mga kamot.​—Itandi ang 2Ha 3:11.

Ang Balaod naglatid nga ang mga saserdote maghugas sa ilang mga kamot ug mga tiil diha sa dulang nga tumbaga nga nahimutang tali sa sangtuwaryo ug sa halaran sa dili pa sila moalagad sa halaran o mosulod sa tolda nga tagboanan. (Ex 30:18-21) Ang Balaod nag-ingon usab nga kon ang usa ka tawong gipatay nakaplagan ug imposible ang pagtino kon kinsa ang mamumuno, ang mga ansiyano sa siyudad nga kinadul-an sa nahimutangan sa tawong gipatay magdalag usa ka batang baka, nga wala pa magamit sa pagtrabaho o wala pa masangoni ug yugo, ngadto sa bul-oganang walog nga may nagaagay nga tubig ug didto balion ang liog niini. Human niini, ang mga ansiyano manghunaw sa ilang mga kamot ibabaw sa batang baka, nga nagpailang sila inosente maylabot niini nga pagbuno. (Deu 21:1-8) Dugang pa, sumala sa Balaod, ang usa ka tawo mahimong mahugaw kon mahikapan sa usa ka tawo nga may inagas nga wala makapanghunaw.​—Lev 15:11.

 Gitinguha ni David ang mga kamot nga mahinlo sa moral aron makasimba atubangan sa halaran ni Jehova. (Sal 26:6) Sa laing bahin, aron mahigawas sa pagkasad-an sa dugo labot sa kamatayon ni Jesus, si Pilato nanghunaw sa iyang mga kamot atubangan sa katawhan. Apan bisan pa niini dili gayod siya mahigawas sa iyang tulubagon labot sa kamatayon ni Jesus, sanglit siya ang adunay awtoridad sa pagdesisyon, dili ang naninggit nga magubtanong panon sa katawhan.​—Mat 27:24.

Ang mga eskriba ug mga Pariseo sa unang siglo K.P. naghatag ug dakong pagtagad sa paghunaw sa mga kamot ug nakiglalis kang Jesu-Kristo labot niini tungod kay gilapas kuno sa iyang mga tinun-an ang mga tradisyon sa mga tawo sa kakaraanan sanglit wala man sila manghunaw sa ilang mga kamot sa dihang hapit nang mangaon. Dili kini kay ordinaryong paghugas lamang sa kamot aron sa paghinlo niini kondili kini maoy usa ka rituwal nga seremonyas. “Ang mga Pariseo ug ang tanang Hudiyo dili mokaon gawas kon makapanghunaw sila sa ilang mga kamot hangtod sa siko.” (Mar 7:2-5; Mat 15:2) Gipakasama sa Babilonyanhong Talmud (Sotah 4b) ang tawong mikaon nga wala manghunaw sa usa ka tawo nga nakighilawas sa usa ka bigaon, ug kini nag-ingon nga ang tawong nagbalewala sa paghunaw sa kamot “pagalukahon gikan sa kalibotan.”​—Tan-awa ang PAGKALIGO.