Ang dili-bug-os o bug-os nga pagkadili-makadungog, nga sagad tungod sa balatian, aksidente, o pagkaladlad sa hilabihan ug kalit o dugay nga kabanha. Sa pipila ka kaso may mga tawong gihimugso nga bungol. Ang laing hinungdan sa pagkabungol nga gihisgotan sa Bibliya mao ang pagkagigamhan sa demonyo. (Mar 9:25-29) Ang lintunganayng pulong sa Hebreohanong termino nga che·reshʹ (“bungol”; Isa 35:5) nagtumong sa pagkadili makadungog o kaha sa dili pagsulti ug sa lainlaing paagi gihubad nga “pagpakabungol” ug “pagpakahilom.”​—Sal 28:1; 35:​22, ftn sa Rbi8; 50:​3, ftn sa Rbi8; Miq 7:16.

Si Jehova, ang Maglalalang sa dalunggan (Pr 20:12), nagsugo sa iyang katawhan nga pakitaag konsiderasyon ang mga bungol. Ang mga Israelinhon dili magbiaybiay o manghimaraot sa mga tawong bungol, kay ang mga bungol dili makadepensa sa ilang kaugalingon batok sa mga pulong nga dili nila madungog.​—Lev 19:14; itandi ang Sal 38:​13, 14.

Ang mga pulong sa Exodo 4:​11, diin gihisgotan ni Jehova ang iyang kaugalingon ingong ‘naghimo sa bungol,’ wala magpasabot nga siya ang hinungdan sa tanang kaso sa pagkabungol. Hinunoa, mahimong ipahinabo ni Jehova nga ang usa ka tawo sa literal mabungol, dili makasulti, o mabuta tungod sa usa ka partikular nga rason o katuyoan.  Ang amahan ni Juan nga Tigbawtismo temporaryo nga naamang tungod kay siya wala motuo. (Luc 1:18-22, 62-64) Puwedeng ‘himoon’ usab sa Diyos ang mga tawo ingong bungol sa espirituwal pinaagi sa pagtugot kanila nga magpabilin niana nga kahimtang kon kana ang ilang pilion.​—Itandi ang Isa 6:​9, 10.

Sa panahon sa iyang ministeryo, daghang higayon nga gipasig-uli ni Jesu-Kristo sa milagrosong paagi ang pandungog sa mga indibiduwal nga bungol sa pisikal. (Mat 11:5; Mar 7:32-37; Luc 7:22) Kini nagpasalig kanato nga ilalom sa iyang pagmando ibabaw sa yuta ang tanang hinungdan sa kasakit, lakip na ang pagkabungol, pagahanawon.

Ang salmista nagtandi sa daotan, nga dili mamati sa pagtultol, ngadto sa kobra nga nagpakabungol sa tingog sa mga maglalamat. (Sal 58:3-5) Sa susama, ang mga Israelinhon sa mga adlaw ni Isaias, bisan tuod adunay mga igdulungog, gipakasamag mga bungol tungod sa ilang kahinay sa pagpamati ug pagsanong sa pulong ni Jehova. (Isa 42:18-20; 43:8) Apan, human sa gitagnang pagpasig-uli gikan sa pagkadestiyero, ang katawhan sa Diyos dili na mabungol sa espirituwal nga paagi. Sila makadungog sa pulong ni Jehova, buot ingnon, sila maghatag nag pagtagad niini. (Isa 29:18; 35:5) Samtang si Jesu-Kristo dinhi pa sa yuta, siya nagbukas sa daghang igdulungog aron sila makasabot ug molihok sumala sa ilang nadunggan.​—Mat 13:​16, 23.