Ang Hebreohanong pulong nga ra·chatsʹ gihubad nga “pagkaligo” o “paghugas” ug mapadapat sa lawas sa tawo ug sa ubang mga butang nga mahinloan pinaagi sa pagtuslob niini sa tubig o sa pagbubo ug tubig diha niini. (Lev 16:24; Gen 24:32) Apan, sa paghubit sa paglaba sa mga besti sa dihang palupalohon kini diha sa tubig, ang mga magsusulat sa Bibliya migamit sa Hebreohanong pulong nga ka·vasʹ, nga kaamgid sa Arabikong pulong nga kabasa (pagmasa; pagtunob) ug sa Akadianhong pulong nga kabasu (pagtamaktamak). Busa, atong mabasa diha sa Levitico 14:8: “Ug ang usa nga nagahinlo sa iyang kaugalingon kinahanglang maglaba [usa ka porma sa ka·vasʹ] sa iyang mga besti ug magkiskis sa tanan niyang buhok ug maligo [wera·chatsʹ] sa tubig ug mamahinlo.”​—Tan-awa usab ang Lev 15:5-27; Num 19:19.

Ang Gregong pulong alang sa “paghugas” maoy lou·tronʹ.​—Tit 3:5.

Ang pisikal nga kahinlo gikinahanglan niadtong magasimba kang Jehova diha sa pagkabalaan ug pagkaputli. Gipadayag kini maylabot sa kahikayan sa tabernakulo ug sa pag-alagad diha sa templo sa ulahi. Sa ilang pagpahiluna-sa-katungdanan, ang Hataas nga Saserdoteng si Aaron ug ang iyang mga anak nga lalaki naligo sa wala pa nila isul-ob ang opisyal nga mga besti. (Ex 29:4-9; 40:12-15; Lev 8:​6, 7) Sa paghugas sa ilang mga kamot ug mga tiil, ang mga saserdote migamit ug tubig gikan sa dulang nga tumbaga didto sa sawang sa tabernakulo  ug, sa ulahi, gikan sa dakong inumol nga dagatdagat didto sa templo ni Solomon. (Ex 30:18-21; 40:30-32; 2Cr 4:2-6) Sa Adlaw sa Pagtabon-sa-Sala ang hataas nga saserdote kaduha maligo. (Lev 16:​4, 23, 24) Kadtong nagdala sa kanding alang kang Azazel, sa mga nahibilin sa mga halad nga hayop, ug sa gihalad nga mapulang baka sa gawas sa kampo, kinahanglang magligo sa ilang mga unod ug maglaba sa ilang mga besti sa dili pa mosulod pag-usab sa kampo.​—Lev 16:26-28; Num 19:2-10.

Sa katibuk-an, ang seremonyal nga pagkaligo sa mga Israelinhon gisugo tungod sa nagkalainlaing mga katarongan. Ang bisan kinsa nga naayo gikan sa sanla, ang bisan kinsa nga nakahikap ug mga butang nga nahikapan niadtong may “inagas,” ang usa ka tawo nga nagawasan ug binhi, ang usa ka babaye human sa pagregla o pagdugo, o ang bisan kinsa nga nakigsekso maoy “mahugaw” ug kinahanglang maligo. (Lev 14:​8, 9; 15:4-27) Ang usa nga anaa sa sulod sa tolda uban sa usa ka patayng lawas sa tawo o nakahikap niini maoy “mahugaw” ug kinahanglang putlion pinaagi sa tubig nga panghinlo. Kon adunay modumili sa pagsunod niini nga regulasyon, siya “pagaputlon gikan sa taliwala sa kongregasyon, tungod kay sangtuwaryo ni Jehova ang iyang gihugawan.” (Num 19:20) Nan, haom nga ang paghugas gigamit sa mahulagwayong paagi sa pagtumong sa usa ka hinlong baroganan sa atubangan ni Jehova. (Sal 26:6; 73:13; Isa 1:16; Eze 16:9) Ang paghugas pinaagi sa pulong ni Jehova sa kamatuoran, nga gisimbolohan sa tubig, adunay gahom sa paghinlo.​—Efe 5:26.

May daklit nga mga paghisgot diha sa Bibliya bahin sa mga tawo nga naligo: ang anak nga babaye ni Paraon didto sa Nilo (Ex 2:5); si Ruth sa wala pa mopresentar sa iyang kaugalingon ngadto kang Boaz (Ru 3:3); si Bat-seba nga wala makahibalong nakita ni David (2Sa 11:​2, 3); si David sa wala pa mohapa didto sa balay ni Jehova (2Sa 12:20); ang mga pampam didto sa linaw sa Samaria (1Ha 22:38). Ang sanlahon nga si Naaman, tungod sa sugo ni Eliseo nga ‘Kaligo ug magmahinlo,’ naligo sa makapito didto sa Suba sa Jordan. (2Ha 5:9-14) Kostumbre kanhi ang pagligo sa bag-ong nahimugsong mga bata ug usab ang pagligo sa lawas sa patayng tawo sa dili pa ilubong.​—Eze 16:4; Buh 9:37.

Sa mainit nga klima sa Tungang Sidlakan diin ang mga tawo molakaw nga magsul-ob ug bukas nga mga sandalyas diha sa abogon nga kadalanan, usa ka timaan sa pagkamaabiabihon ug kalulot ang paghugas sa mga tiil sa mga dinapit sa usa ka tawo. Gipakita ni Abraham kini nga kalulot ngadto sa mga manulonda (Gen 18:1-4); gihimo usab kini ni Lot, Laban, ug Abigail. (Gen 19:​1, 2; 24:29-32; 1Sa 25:41; Luc 7:​38, 44; 1Ti 5:10) Gihugasan usab ni Jesus ang mga tiil sa iyang mga tinun-an.​—Ju 13:5-17; tan-awa ang PAGHUGAS SA MGA TIIL.

Ang mga Pariseo naghugas sa “ilang mga kamot hangtod sa siko,” dili tungod sa kahinlo, kondili tungod sa estriktong pagsunod sa rabbinikong mga tradisyon.​—Mar 7:1-5; Mat 15:​1, 2.