Usa ka pagbati sa pagsimpatiya sa pag-antos o kagul-anan sa laing tawo uban ang tinguha sa paghupay niini. Ang usa sa Hebreohanong mga pulong nga may diwa sa pagkamabination o kaluoy mao ang berbong cha·malʹ, nga nagkahulogang “maluoy; ibilin.” (Ex 2:6; Mal 3:17; Jer 50:14) Ang Gregong berbo nga oi·kteiʹro nagkahulogang “magpakitag pagkamabination,” samtang ang nombreng oi·ktir·mosʹ naghubit sa pangsulod nga pagkamabination, o malumong kaluoy. (Rom 9:15; 12:1; 2Co 1:3; Flp 2:1; Col 3:12; Heb 10:28) Ang Gregong pulong nga splagʹkhna (mga tinai) mahimong magkahulogan ug malumong pagkamabination.​—1Ju 3:17.

Ang labing talagsaong panig-ingnan sa pagkamabination mao si Jehova mismo. Kini giilustrar pag-ayo sa iyang mga pagpakiglabot sa mga Israelinhon. Dili lamang kay siya naluoy kaayo kanila panahon sa ilang mga kagul-anan didto sa Ehipto kondili sa kataposan siya nagluwas kanila gikan sa mga kamot sa ilang mga tigdaogdaog ug mahigugmaong nag-atiman kanila didto sa kamingawan. (Isa 63:7-9) Bisan pag sa makadaghan sila wala magmatinumanon kaniya sa dihang nagpuyo sila sa Yutang Saad, siya sublisubling nagluwas kanila gikan sa mga kamot sa ilang mga kaaway, ug naminaw sa ilang mga pagtuaw sa pagpakitabang.​—Huk 2:11-19.

Apan, sa kataposan ang mga Israelinhon miabot sa punto nga imposible na silang maghinulsol. Hilabihan ang ilang pagkalangkit sa idolatriya, nga gani sila nagdalag mga idolo diha mismo sa sangtuwaryo ni Jehova ug ilang gihugawan kini. Ang katawhan padayong nagyagayaga sa mga manalagna ug nagtamay sa pulong ni Jehova. Ang Labing Hataas dili na makapakitag pagkamabination o kaluoy kanila. Busa iyang gitugyan sila ngadto sa mga kamot ni Haring Nabucodonosor ug gituman ang paghukom nga daan nang gimantala pinaagi sa mga manalagna.​—2Cr 36:15-17; Jer 13:14; 21:7; Eze 5:11; 8:​17, 18.

 Kon Kanus-a nga Kini Dili Ipakita. Sa pagsundog kang Jehova, ang tanang tinuod nga nakaila kaniya maningkamot nga magmabination. (Efe 4:32–​5:1) Apan, adunay mga panahon nga ang pagkamabination o kaluoy dili angayng ipakita. Sa kahimtang sa mga tawo nga nagpadayon sa pagpakasala ug tinuyong nagsupak sa matarong nga mga dalan ni Jehova, dili husto nga tungod sa kaluoy panalipdan sila gikan sa silot nga takos sa ilang binuhatan.​—Deu 13:6-11; Heb 10:28.

Ang pagpadaog sa pagpit-os aron mopakitag pagkamabination o kaluoy sa dihang kini sukwahi sa kabubut-on sa Diyos mopahinabog makadaot nga mga sangpotanan. Gipakita kini labot sa nahitabo kang Haring Saul. Miabot na ang panahon nga ipahamtang ang paghukom sa Diyos batok sa mga Amalekanhon, ang unang katawhan nga mihimog pag-atake sa mga Israelinhon human sa ilang pagbiya sa Ehipto bisag kini nga katawhan wala hilabti sa mga Israelinhon. Si Saul gisugo nga dili magpakitag pagkamabination kanila. Kay nagpadaog sa pagpit-os sa iyang mga ginsakpan, wala niya bug-os sunda ang sugo ni Jehova. Busa, si Jehova nagsalikway kang Saul ingong hari. (1Sa 15:2-24) Kon ugmaron sa usa ka tawo ang halalom nga pagpabili sa pagkamatarong sa mga dalan ni Jehova ug himoon niya ang pagkamaunongon Kaniya nga una sa tanang butang, kini makapugong kaniya nga dili makasala sama kang Saul, ug dili mawad-an sa pag-uyon sa Diyos.