Ang dalayegon ug mainitong pagkaandam sa pagbulahan sa uban pinaagi sa kinabubut-ong paghatag, nga walay pagtinihik. Ang Hebreohanong pulong nga na·dhivʹ, nga gihubad nga “mahinatagon” diha sa Isaias 32:​8, gihubad usab nga ‘masinugtanon’ ug “hamili.” (Sal 51:12; Num 21:​18, ftn sa Rbi8) Ang Gregong nombre nga ha·ploʹtes (“pagkamahinatagon” [2Co 8:2; 9:11; Rom 12:8]; “katim-os” [Efe 6:5]) adunay pangunang kahulogan nga “kayano.” (2Co 11:​3, Int) Si Jehova mismo mao ang personipikasyon sa pagkamahinatagon, ang Usa nga bug-os nagtagana sa tanang panginahanglan sa iyang masinugtanong mga linalang “sumala sa iyang kabubut-on.” (1Ju 5:14; Flp 4:19) Ang tanang maayong gasa ug hingpit nga regalo naggikan kaniya, lakip sa dili-matukib nga gasa sama sa kaalam.​—San 1:​5, 17.

Giawhag ni Moises ang iyang mga isigka-Israelinhon sa pag-ugmad niining diyosnon nga hiyas sa pagkamahinatagon, bisan sa dihang magpahulam nga may garantiya. “Dili mo patig-ahon ang imong kasingkasing ni kumkomon ang imong kamot sa imong igsoon nga kabos. Kay ikaw kinahanglang magbukhad sa imong kamot alang kaniya . . . Maghatag ka gayod kaniya, ug ang imong kasingkasing kinahanglan nga dili magtinihik sa imong paghatag kaniya . . . Tungod niana nagasugo ako kanimo, nga nagaingon, ‘Ikaw kinahanglang magbukhad sa imong kamot sa sinakit ug sa kabos mo nga igsoon nga anaa sa imong yuta.’”​—Deu 15:7-11.

Nagaingon ang proverbio: “Ang kalag nga mahinatagon [sa literal, ang kalag nga may usa ka panalanging gasa] motambok [magmauswagon], ug ang dagayang nagabisibis sa uban dagaya usab nga pagabisibisan.” (Pr 11:25) Ingon niini ang gipahayag ni Jesu-Kristo: “Adunay labaw nga kalipay sa paghatag kay sa pagdawat.” (Buh 20:35) Sa makausa pa siya miingon: “Batasana ang paghatag, ug pagahatagan kamo sa mga tawo. Ibubo nila sa inyong sabakan ang usa ka maayong takos, dinasok, tinantan ug nagaawas. Kay sa sukod nga inyong ginasukod, sila magasukod nganha kaninyo ingong balos.”​—Luc 6:38.

Sa Kristohanong Kongregasyon. Si apostol Pablo nagpahayag usab niining popular nga panultihon sa lain pa nga paagi: “Siya nga nagapugas ug tagidyot magaani usab nga tagidyot; ug siya nga nagapugas nga madagayaon magaani usab nga madagayaon.” Sanglit mao kini ang kahimtang, ang apostol nangatarongan, “ipabuhat sa matag usa ang sumala sa iyang gihukom diha sa iyang kasingkasing, dili nga kontragusto o pinugos, kay gihigugma sa Diyos ang malipayong maghahatag.” (2Co 9:​6, 7) Si Pablo nagpadayon sa pagpunting sa dakong panig-ingnan ni Jehova sa pagkamahinatagon dili lamang sa madagayaong paghatag ug binhi alang sa magpupugas ug tinapay ingong pagkaon kondili sa pagbuhong usab sa mga igsoon sa Corinto “alang sa tanang matang sa pagkamahinatagon,” aron sila magmahinatagon ngadto sa uban. Gipahayag ni Pablo nga tungod sa maong mga buhat sa pagkamahinatagon, kini nakahatag ug ‘mga pasalamat sa Diyos.’​—2Co 9:8-13.

Si Pablo, nga nagdasig niining samang diyosnong pagkamahinatagon, misulat sa mga taga-Roma (12:8): “Siya nga nang-apod-apod, ipabuhat kini kaniya uban ang pagkamahinatagon.” Ngadto sa mga Hebreohanon (13:16) siya misulat: “Dugang pa, ayaw kalimti ang pagbuhat ug maayo ug ang pagpakig-ambit sa mga butang sa uban, kay ang maong mga halad gikahimut-an  sa Diyos.” Ang mga kongregasyon sa Macedonia maoy talagsaong mga panig-ingnan sa pagkamahinatagon. Ngani, ang ilang malipayong paghatag ug “labaw sa ilang maarangan,” nga nag-amot bisan pa sa ilang pagkakabos, “nagpadagaya sa bahandi sa ilang pagkamahinatagon.”​—2Co 8:1-4.

Angayng matikdan nga kini nga mga teksto bahin sa pagkamahinatagon dili kasumpaki sa ubang mga teksto nga nagkondenar sa mga ingrato, puloho, ug tapolan nga mga tawo. Pananglitan, ang tapolan nga dili magdaro panahon sa tingtugnaw angayng dili hatagan kon mangayo sa panahon sa ting-ani; siya nga dili motrabaho walay katungod nga makabenepisyo sa pagkamahinatagon sa uban. (Pr 20:4; 2Te 3:10) Ang mga babayeng balo dili ibutang sa listahan sa hatagan ug hinabang gawas kon sila kuwalipikado. (1Ti 5:​9, 10) Ang mga pag-amot nga gihimo sa mga kongregasyon sa tibuok Galacia, Macedonia, ug Acaya maoy dili alang sa mga kabos taliwala sa paganong mga magsisimba sa katibuk-an kondili alang sa “mga balaan” nga nanginahanglan.​—1Co 16:1; 2Co 9:​1, 2.