Ang pagputi sa kolor sa buhok tungod sa pagkunhod sa itom nga substansiya sa buhok ingong resulta sa mga kausaban sa kemistriya sa lawas. Talagsa ra nga sayo nga mahimong ubanon, apan sagad nga kini maoy duyog sa pagkatigulang. Kining ulahi nga ideya labot sa pagkatigulang mao ang makita diha sa Bibliya sa dihang gigamit ang Hebreohanong berbo nga siv (giuban), ug sa mas subsob, ang Hebreohanong nombre nga seh·vahʹ (mga uban, pagkaubanon, pagkatigulang). (Ru 4:15; 1Sa 12:2; 1Ha 2:​6, 9; Job 15:10; Sal 71:18) Si Abraham, Gideon, ug si David nabuhi hangtod sa “igong katigulangon” o “nga tigulang na [seh·vahʹ].”​—Gen 15:15; 25:8; Huk 8:32; 1Cr 29:28.

Giila sa Bibliya ang katahom sa pagkabatan-on ug ang kahalangdon sa pagkatigulang. “Ang katahom sa batan-ong mga lalaki mao ang ilang kusog, ug ang kahalangdon sa mga tigulang mao ang ilang pagkaubanon.” (Pr 20:29) Kining ulahing gihisgotan ilabinang tinuod kon ang maong mga tigulang nagasimba ug nagaalagad kang Jehova.  “Ang pagkaubanon maoy usa ka purongpurong sa katahom sa dihang makaplagan kini sa dalan sa pagkamatarong.” (Pr 16:31) “Sila nga natanom diha sa balay ni Jehova, . . . sila magpadayon pa gihapon sa paglipang panahon sa ilang pagkaubanon.” (Sal 92:​13, 14) Sila dili pagabiyaan sa ilang Diyos. (Isa 46:4) Ang balaod ni Jehova mao: “Atubangan sa buhok nga ubanon motindog ka, ug magpakita ka ug pagtamod sa tawong tigulang.”​—Lev 19:32.

Ang pagkaubanon wala mag-agad kon siya lalaki man o babaye; mao man usab ang kinaiyanhong kolor sa buhok, kon kini bulagaw man, itomon, o pula. Dugay nang giila nga ang pagkaubanon dili mapugngan sa tawo o matambalan sa medikal nga siyensiya. Kini mao ang gipunting ni Jesu-Kristo human nga siya miingon nga dili kita manumpa sa atong mga ulo.​—Mat 5:36.

Ang mga tina sa buhok dili kay modernong kaplag, sanglit gigamit na kini sa mga Grego ug mga Romano kaniadto. Sumala kang Josephus, gitaho nga si Herodes nga Bantogan nagtina sa iyang giuban na nga mga buhok aron itago ang iyang pagkatigulang.​—Jewish Antiquities, XVI, 233 (viii, 1).