Ang usa ka Hebreohanong pulong nga gihubad nga “walay-ikasaway” mao ang tam. Kini gigamit maylabot sa sulondang moral nga baroganan ni Job ug sa walay-ikasaway nga katahom sa Sulamita. (Job 1:​1, 8; Aw 5:2; 6:9) Tungod sa iyang madaiton, malinawon nga kinabuhi diha sa mga tolda kon itandi sa iyang latagaw ug mangangayam nga igsoon, si Jacob giingong walay-ikasaway. (Gen 25:27) Ang laing Hebreohanong pulong nga usahay gihubad nga “walay-ikasaway” mao ang ta·mimʹ, nga nagkahulogang “walay-kasaypanan; maayo; hingpit.” (Pr 2:21; 11:​5, 20) Ang Hebreohanong mga pulong nga tam ug ta·mimʹ naggikan sa lintunganayng berbo nga ta·mamʹ, nga nagkahulogang “mabug-os o kompleto, natapos; modangat sa kahingpitan; matibawas.” (Sal 19:13; 1Ha 6:22; Isa 18:5; Jer 24:10; itandi ang 1Sa 16:​11, diin ang prase nga gihubad nga “Kini lang ba ang tanan mong mga anak nga lalaki?” sa literal nagkahulogang “Kompleto na ba ang imong mga anak nga lalaki?”) Sa Gregong Septuagint, ang Hebreohanong pulong nga tam usahay gihubad nga aʹmem·ptos. (Job 1:​1, 8; 2:3; 9:20) Ang mga porma niini nga pulong makita usab diha sa Kristohanon Gregong Kasulatan ug mahimong magkahulogan ingong “walay-ikasaway” o walay-kasaypanan.​—Luc 1:6; Flp 3:6; Heb 8:7; tan-awa ang PAGKAHINGPIT, KAHINGPITAN.

Sa dihang gamiton sa paghubit sa mga tawo, ang terminong “walay-ikasaway” kinahanglang isipon kanunay ingong relatibo, dili absoluto. Ang nag-antos nga si Job mihimog sayop nga mga panghinapos bahin kang Jehova, nga naglakip sa kon unsay panglantaw sa Labing Gamhanan bahin sa mga tawong walay-ikasaway. (Job 9:20-22) Si Zacarias, ang amahan ni Juan nga Tigbawtismo, nagpakitag kakulang sa pagtuo sa gipahayag ni Jehova pinaagi sa manulonda nga si Gabriel. (Luc 1:18-20) Sa gihapon, si Job ug Zacarias giingong mga walay-ikasaway, kay sila nakapasar sa gidahom ni Jehova sa mga tawo kinsa, bisan tuod matinumanon, naduhigan sa pagkadili-hingpit.​—Job 1:1; Luc 1:6.

Sa panglantaw sa iyang Hudiyong mga katalirongan, si Pablo walay-ikasaway sa wala pa siya mahimong usa ka tinun-an ni Jesu-Kristo. Gibuhat niya ang gisugo sa Balaod, nga nagtuman sa mga obligasyon nga gihatag kaniya ug gilikayan ang mga butang nga gidili. (Flp 3:6) Apan si Pablo niadtong panahona wala makabaton ug walay-ikasaway nga baroganan atubangan ni Jehova. Siya sad-an sa grabeng sala ingong usa ka maglulutos sa mga igsoon ni Kristo ug kanhi siya usa ka tigpasipala ug usa ka tawong bagis.​—1Ti 1:​13, 15.

Ang Labing Hataas nahimuot sa mga tawo kansang panggawi nagpabanaag sa ilang maayong espirituwal nga kahimtang, sa ilang kaputli, sa ilang pagkawalay-ikasaway. (Pr 11:20) Busa hinungdanon nga ang mga Kristohanon magkinabuhi sa paagi nga walay-ikasaway, nga mahigawas gikan sa makataronganong pagbadlong.​—Flp 2:15; 1Te 5:23.