Ang Gregong pulong nga a·tha·na·siʹa naporma pinaagi sa negatibong prefix nga a nga gisundan sa usa ka porma sa pulong alang sa “kamatayon” (thaʹna·tos). Busa, ang pangunang kahulogan maoy “pagkawalay-kamatayon,” ug nagtumong sa matang sa kinabuhi nga gipahimuslan, ang pagkawalay-kataposan ug pagkadili-malaglag niini. (1Co 15:​53, 54, ftn sa Rbi8; 1Ti 6:​16, ftn sa Rbi8) Ang Gregong pulong nga a·phthar·siʹa, nga nagkahulogang “pagkadili-madunoton,” nagtumong nianang dili madugta o madunot, nianang dili madaot.​—Rom 2:7; 1Co 15:​42, 50, 53; Efe 6:24; 2Ti 1:10.

Ang mga ekspresyon nga “walay-kamatayon” o “pagkawalay-kamatayon” dili makaplagan sa Hebreohanong Kasulatan, apan gipakita niini nga si Jehova nga Diyos, ingong Tuboran sa tanang kinabuhi, dili mamatay, ug busa, walay-kamatayon. (Sal 36:​7, 9; 90:​1, 2; Hab 1:12) Kini nga kamatuoran gipasiugda usab sa Kristohanong apostol nga si Pablo sa dihang gihisgotan niya ang Diyos ingong “Hari nga walay kataposan, dili-madunoton.”​—1Ti 1:17.

 Ingon sa gipakita sa artikulong KALAG, gipatin-aw usab sa Hebreohanong Kasulatan nga ang tawo dili sa kinaiyanhon walay-kamatayon. Daghan ang gihisgotan niini nga ang tawhanong kalag (Heb., neʹphesh) mamatay, modangat sa lubnganan, ug gilaglag. (Gen 17:14; Jos 10:32; Job 33:22; Sal 22:29; 78:50; Eze 18:​4, 20) Sa pagkatinuod, kaharmonya kini sa gipamulong sa Kristohanon Gregong Kasulatan diin gihisgotan usab niini ang pagkamatay sa kalag (Gr., psy·kheʹ). (Mat 26:38; Mar 3:4; Buh 3:23; San 5:20; Pin 8:9; 16:3) Busa wala supaka o bag-oha sa Kristohanon Gregong Kasulatan ang inspiradong pagtulon-an sa Hebreohanong Kasulatan nga ang tawo nga mao ang tawhanong kalag, may-kamatayon ug mahimong mamatay. Apan, makaplagan sa Kristohanon Gregong Kasulatan ang gipadayag nga katuyoan sa Diyos nga hatagan ug pagkawalay-kamatayon ang pipila sa iyang mga alagad.

Sa unsang paagi si Jesus “mao lamang ang nagbaton sa pagkawalay-kamatayon”?

Ang unang gihubit sa Bibliya nga gigantihan ug gasa nga pagkawalay-kamatayon mao si Jesu-Kristo. Si Jesus wala magbaton ug pagkawalay-kamatayon sa wala pa siya banhawa sa Diyos kay ang mga pulong sa inspiradong apostol sa Roma 6:9 nag-ingon: “Si Kristo, karon nga siya gibangon na gikan sa mga patay, dili na mamatay; ang kamatayon dili na agalon ibabaw kaniya.” (Itandi ang Pin 1:​17, 18.) Tungod niini, sa paghubit kaniya ingong “Hari sa mga nagmando ingong mga hari ug Ginoo sa mga nagmando ingong mga ginoo,” ang 1 Timoteo 6:​15, 16 nagpakita nga si Jesus maoy lahi gikan sa tanang uban nga mga hari ug mga ginoo sanglit siya “mao lamang ang nagbaton sa pagkawalay-kamatayon.” Ang ubang mga hari ug mga ginoo mamatay sama usab sa hataas nga mga saserdote sa Israel. Apan ang hinimayang si Jesus, ang tinudlo sa Diyos nga Hataas nga Saserdote nga sama kang Melquisedek, may “kinabuhi nga dili malaglag.”​—Heb 7:15-17, 23-25.

Ang mga pulong dinhi nga “dili malaglag” gihubad gikan sa Gregong termino nga a·ka·taʹly·tos, nga sa literal nagkahulogang, “dili-mahanaw.” (Heb 7:​16, ftn sa Rbi8) Kini nga pulong maoy kombinasyon sa negatibong prefix nga a nga gisumpayan ug laing mga pulong nga nalangkit sa “pagkatun-as,” sama sa gisulti ni Jesus mahitungod sa pagkatun-as o pagkatumpag sa mga bato sa templo sa Jerusalem (Mat 24:​1, 2), ingon man sa paghisgot ni Pablo sa pagkatun-as sa yutan-ong “tolda” sa mga Kristohanon, nga mao, ang pagkahanaw sa ilang yutan-ong kinabuhi sa tawhanong mga lawas. (2Co 5:1) Busa, ang walay-kamatayong kinabuhi nga gihatag kang Jesus human sa iyang pagkabanhaw dili lamang kay walay-kataposan kondili maoy kinabuhi nga dili madunot o mahanaw ug dili malaglag.

Ang mga Manununod sa Gingharian Gihatagan ug Pagkawalay-kamatayon. Alang sa dinihogang mga Kristohanon nga gitawag aron maghari uban ni Kristo didto sa mga langit (1Pe 1:​3, 4), sila gisaaran nga makaambit uban ni Kristo diha sa dagway sa iyang pagkabanhaw o sa pagkabanhaw nga sama nianang kang Kristo. (Rom 6:5) Busa, sama sa kahimtang sa ilang Ginoo ug Ulo, ang dinihogang mga membro sa Kristohanong kongregasyon nga namatay nga matinumanon mabanhaw ngadto sa walay-kamatayong espirituhanong kinabuhi, mao nga “kini nga may-kamatayon angay magsul-ob ug pagkawalay-kamatayon.” (1Co 15:50-54) Sama kang Jesus, ang ilang pagkawalay-kamatayon wala lamang magpasabot ug kinabuhing walay kataposan o yanong kagawasan gikan sa kamatayon. Ingong isigkamanununod ni Kristo, sila usab gihatagan “sa gahom sa kinabuhi nga dili malaglag,” ug makita kini sa dihang gilangkit ni apostol Pablo ang pagkadili-madunoton uban sa pagkawalay-kamatayon nga ilang mabatonan. (1Co 15:42-49) Kanila “ang ikaduhang kamatayon walay awtoridad.”​—Pin 20:6; tan-awa ang PAGKADILI-MADUNOTON.

Kining paghatag sa pagkawalay-kamatayon ngadto sa mga manununod sa Gingharian talagsaon gayod, sanglit bisan ang mga manulonda sa Diyos gipakita man ingong may-kamatayon, bisan tuod sila naghupot ug espirituhanong mga lawas, dili mga unodnon. Ang pagkamay-kamatayon sa mga manulonda tatawng makita pinasukad sa hukom nga kamatayon nga gipakanaog batok sa espiritung anak kinsa nahimong Kaaway sa Diyos, o Satanas, ug batok usab niadtong ubang mga manulonda nga misunod nianang satanasnong dalan ug “wala magpadayon sa paghupot sa ilang orihinal nga pagkabutang apan mitalikod sa ilang nahiangay nga puloy-anang dapit.” (Jud 6; Mat 25:41; Pin 20:​10, 14) Busa ang paghatag sa “kinabuhi nga dili malaglag” (Heb 7:16) o sa “kinabuhi nga dili mahanaw” ngadto sa mga Kristohanon nga nakabaton sa pribilehiyo nga maghari uban sa Anak sa Diyos sa langitnong Gingharian maoy usa ka kahibulongang  pagpasundayag sa pagsalig sa Diyos kanila.​—Tan-awa ang LANGIT (Ang dalan ngadto sa langitnong kinabuhi); KINABUHI.