Aron ang mga balaod, mga mando, ug mga sugo mahimong mapuslanon ug bililhon, kini kinahanglang ipatuman sa legal nga paagi. Sagad ang pagpahamtang ug paghukom maoy may kalabotan sa pagpatuman sa mga silot, ilabina sa silot nga kamatayon, tungod sa paglapas sa mga balaod. Ang Kinalabwang Balaod dili lamang adunay Maghahatag-balaod, kini usab adunay Tigpatuman sa Balaod: “Si Jehova mao ang atong Maghuhukom, si Jehova mao ang atong Maghahatag-lagda, si Jehova mao ang atong Hari.” “Usa lamang ang maghahatag-balaod ug maghuhukom.” (Isa 33:22; San 4:12) Busa si Jehova maoy usa ka tigpahamtang sa paghukom ug panimalos batok sa mga maglalapas sa Iyang balaod.​—Ex 12:12; Deu 10:​17, 18; Eze 25:11-17; 2Te 1:6-9; Jud 14, 15.

Si Jehova usab nagdelegar ug gahom sa pagpahamtang ug silot ngadto sa uban. Pananglitan: “Ang inyong dugo sa inyong mga kalag akong paninglon. . . . Gikan sa kamot sa matag usa nga iyang igsoon, akong paninglon ang kalag sa tawo. Ang bisan kinsa nga magaula ug dugo sa tawo, pinaagi sa tawo ang iyang kaugalingong dugo igaula, kay sa larawan sa Diyos iyang gibuhat ang tawo.” (Gen 9:​5, 6) Niining bahina ang pipila ka responsibilidad ingong tigpahamtang ug silot gisangon diha sa “tigpanimalos sa dugo.” (Num 35:19; tan-awa ang TIGPANIMALOS SA DUGO.) Depende sa mga sirkumstansiya, ang awtoridad ingong tigpahamtang ug silot usahay gitugyan ngadto sa mga saserdote sa Israel (Num 5:15-31) o sa tibuok kongregasyon, diin ang mga saksing-nakakita maoy manguna sa pagpatay sa nakasala. (Lev 24:14-16; Deu 17:2-7) Ang awtoridad sa pagpahamtang ug silot gitugyan usab ngadto sa mga kamot sa mga maghuhukom ug mga hari o sa usa nga ilang gitudlo.​—Huk 8:​20, 21; 2Sa 1:15; 1Cr 14:16; 2Ha 9:​6-9; 10:24-28; Jer 21:12; 22:3.

Ang karaang mga magmamando gilibotan sa sinaligang mga guwardiya kinsa gipiyalan sa pagpatuman sa mga mando sa ilang agalon. Si Potipar maoy usa nga nakahupot niini nga posisyon. (Gen 37:36; 41:12) Usa sa mga guwardiya ni Herodes ang nagpunggot sa ulo ni Juan nga Tigbawtismo.​—Mar 6:27.

Ang pagpahamtang ug silot nga kamatayon didto sa Israel maoy pinaagig pagbato o kaha pinaagi sa espada. (Lev 20:2; 2Sa 1:15) Ang Mesiyanikong Hari ni Jehova, si Ginoong Jesu-Kristo, ug ang uban niyang maunongon nga langitnong mga kaubanan maoy legal nga mga tigpahamtang ug silot, nga giawtorisahan sa “Maghuhukom sa tibuok yuta.”​—Gen 18:25; Sal 149:6-9; Pin 12:7-9; 19:11-16; 20:1-3.