Ang kataposang proseso sa pagbulag sa mga lugas sama sa sebada ug trigo gikan sa tahop ug sa uhot niini. Human matangtang ang lugas gikan sa tahop pinaagi sa paggiok, ug ang uhot mapinopino na, ang tibuok nga giniok paliran pinaagi sa pag-itsa niini nga sungsong sa hangin ginamit ang igpapalid nga pala o kahig. (Isa 30:24) Ang hangin, nga ilabinang kusog inigkagabii, magpalid sa tahop, magpadpad sa uhot ngadto sa daplin, ug maghulog sa bug-at nga lugas balik sa salog sa giokanan. (Ru 3:2; HULAGWAY, Tomo 2, p. 953) Human maayag ang mga lugas aron makuha ang gagmayng mga bato ug mga susama niini, kini mahimo nang galingon o tipigan.​—Am 9:9; Luc 22:31.

Mahulagwayong Paggamit. Sagad nga ang ‘pagpalid’ gigamit sa mahulagwayong diwa. Pananglitan, katuyoan ni Jehova nga magpadala ug “mga tigpalid” batok sa Babilonya ug sa mga molupyo niini aron sila magpalid kaniya. (Jer 51:​1, 2) Kini nga “mga tigpalid” napamatud-ang mao ang mga Medianhon ug mga Persianhon ubos ni Ciro. Sa ingon, ilang giitsa ang Babilonya ug ang mga molupyo niini ngadto sa hangin, aron ang hangin magpadpad ug magpalid kanila sama sa tahop nga pagasunogon. (Mat 3:12; Luc 3:17) Sa susama, ingon sa gitagna, si Jehova una pa niini migamit sa Babilonya aron sa pagpalid sa iyang katawhan, nga nagpatibulaag kanila sa kapildihan. (Jer 15:7) Ug, pinaagi sa manalagnang si Isaias, gipasaligan ni Jehova ang iyang katawhan nga moabot ang panahon sa dihang sila maghimo sa ilang mga kaaway nga sama sa tahop ug magpalid kanila. (Isa 41:14-16) Sa Jeremias 4:11 ang usa ka “mainit nga hangin” nga modangat sa Jerusalem gikaingon nga maoy ‘dili alang sa pagpalid, ni sa paghinlo.’ Ang usa ka naghaguros, mainit nga hangin dili angayan alang sa pagpalid, busa kini nagtumong sa malaglagon nga kinaiyahan niini.