Ang pagpanag-an naglangkob sa tanang matang sa pagbaton ug sekretong kahibalo, ilabina bahin sa umaabot nga mga panghitabo, pinaagi sa tabang sa okultong mga gahom. (Tan-awa ang ESPIRITISMO.) Alang sa pagkonsiderar sa linaing mga aspekto sa pagpanag-an, tan-awa ang ASTROLOGO; DIWATAHAN; TIGPANAG-AN SA MGA HITABO; SALAMANGKA UG PAMARANG.

Ang mga mananag-an nagtuo nga ang mga diyos nagbutyag sa umalabot ngadto sa tawong nabansay sa pagbasa ug sa paghubad sa pipila ka ilhanan ug mga tilimad-on, nga matod nila gipahibalo sa nagkalainlaing paagi: Pinaagi sa katingalahang mga hitabo sa langit (ang posisyon ug paglihok sa mga bituon ug mga planeta, mga eklipse, mga bulalakaw), pinaagi sa pisikal nga mga puwersa sa yuta (hangin, bagyo, kalayo), pinaagi sa mga lihok sa mga linalang (pag-uwang sa mga iro, paglupad sa mga langgam, paglihok sa mga bitin), pinaagi sa mga porma sa mga dahon sa tsa diha sa mga tasa, pinaagi sa mga porma sa lana diha sa tubig, pinaagi sa direksiyon sa mga udyong nga nahulog, pinaagi sa dagway sa mga sangkap sa lawas sa gihalad nga mga hayop (atay, baga, tinai),  pinaagi sa mga badlis sa palad, pinaagi sa pagripa, ug pinaagi sa “mga espiritu” sa patay.

Ang pipila ka matang sa pagpanag-an gihatagan ug espesipikong mga ngalan. Pananglitan, ang augury, nga popular sa mga Romano, maoy usa ka pagtuon sa mga tilimad-on o sa katingalahan ug sulagma nga mga hitabo; ang pagpanghimalad maoy pagtag-an sa umaabot pinasukad sa mga badlis sa palad; ang hepatoscopy maoy pagpanag-an pinaagig pagsusi sa atay; ang haruspication maoy pinaagig pagsusi sa tinai; ang belomancy maoy pinaagig mga udyong; ang rhabdomancy maoy pinaagig paggamit ug sungkod sa pagpanag-an; ang oneiromancy maoy pinaagig mga damgo; ang necromancy giingon nga maoy pagpakisayod sa mga patay. Ang pagtan-aw sa bolang kristal ug ang pagkonsulta sa orakulo maoy lain usab nga mga matang sa pagpanag-an.

Sinugdanan. Ang pagpanag-an nagsugod sa Babilonya, ang yuta sa mga Caldeanhon, ug gikan didto kini nga mga buhat sa okultismo mikaylap sa tibuok yuta tungod sa paglalin sa mga tawo. (Gen 11:​8, 9) Maylabot sa nakalotang bahin sa librarya ni Ashurbanipal, ang ikaupat nga bahin niini giingong puno sa mga papan alang sa mga tilimad-on nga gituohang makahubad sa tanang talagsaong mga butang nga naobserbahan sa kalangitan ug sa yuta, maingon man sa tanang dili-tinuyo ug sulagma nga mga panghitabo sa adlaw-adlaw nga kinabuhi. Sa wala pa mohimog desisyon sa pagsulong sa Jerusalem, si Haring Nabucodonosor midangop una sa pagpanag-an, ug mahitungod niini kini ang gisulat: “Giuyog niya ang mga udyong. Nangutana siya pinaagi sa terapim; misusi siya sa atay. Sa iyang tuong kamot ang pagpanag-an maoy alang sa Jerusalem.”​—Eze 21:​21, 22.

Ang pagsusi sa atay aron makakitag mga tilimad-on gipasukad sa pagtuo nga ang tanang kusog, pagbati, ug pagmahal nahasentro niini nga sangkap. Ang ikaunom nga bahin sa dugo sa tawo anaa sa atay. Ang mga kausaban sa hitsura sa lainlaing mga parte sa atay giinterpretar ingong mga ilhanan o mga tilimad-on gikan sa mga diyos. (Tan-awa ang ASTROLOGO.) Daghang hulad sa mga atay nga gama sa yutang-kulonon ang nakaplagan, ang labing karaan maoy gikan sa Babilonya, nga naundan ug mga tilimad-on ug mga sinulat nga cuneiform nga gigamit sa mga mananag-an. (HULAGWAY, Tomo 2, p. 324) Ang karaang Asiryanhong mga saserdote gitawag ug mga baru, nga nagkahulogang “tigsusi” o “siya nga nagtan-aw,” tungod kay ang pagsusi sa atay maoy dakong bahin sa ilang relihiyon sa pagpanag-an.

Gikondenar sa Bibliya. Ang tanang nagkalainlaing matang sa pagpanag-an, bisan unsa pay ngalan niini, sukwahi kaayo ug dayag nga maoy pagsupak sa Balaang Bibliya. Si Jehova pinaagi kang Moises hugot ug sublisubli nga nagpasidaan sa Israel sa dili pagsagop niini nga mga buhat sa pagpanag-an sa ubang mga nasod, nga nag-ingon: “Walay makaplagan diha kanimo nga bisan kinsang magpaagi sa iyang anak nga lalaki o sa iyang anak nga babaye sa kalayo, bisan kinsa nga nagapanag-an, usa ka salamangkero o bisan kinsa nga nagapangitag mga tilimad-on o usa nga barangan, o usa nga tigpangdaot o bisan kinsa nga nagakonsultag espiritista o tigpanagna sa mga hitabo o bisan kinsa nga nagapakisayod sa mga patay. Kay bisan kinsa nga nagabuhat niining mga butanga dulumtanan kang Jehova, ug tungod niining dulumtanan nga mga butang si Jehova nga imong Diyos nagahingilin kanila gikan sa imong atubangan.” (Deu 18:9-12; Lev 19:​26, 31) Bisan pag matinuod ang ilang matagnaong mga ilhanan ug mga tilimad-on, ang mga mananag-an dili mahigawas sa paghukom. (Deu 13:1-5; Jer 23:32; Zac 10:2) Gipakita sa Bibliya ang hugot nga pagsupak batok niini nga mga mananag-an pinaagi sa sugo nga ang tanang mananag-an pagapatyon gayod.​—Ex 22:18; Lev 20:27.

Apan bisan pa niining sublisubling mga sugo, matamayong gibalewala sa mga apostata si Jehova​—dili lamang sa ordinaryong mga tawo sama sa babaye sa En-dor, kondili sa gamhanang mga hari usab sama kang Saul ug Manases, ug ni Rayna Jezebel. (1Sa 28:​7, 8; 2Ha 9:22; 21:1-6; 2Cr 33:1-6) Bisan tuod gipapha sa maayong hari nga si Haring Josias ang mga mananag-an sa iyang adlaw, kadto dili igo aron maluwas ang Juda sa pagkalaglag, sama sa nahitabo sa igsoong gingharian niini, ang Israel. (2Ha 17:12-18; 23:24-27) Apan si Jehova, tungod sa iyang mahigugmaong-kalulot, nagpadala una sa iyang mga manalagna aron magpasidaan kanila bahin sa ilang dulumtanang mga buhat, maingon nga ang iyang mga manalagna nagpasidaan sa inahan sa tanang pagpanag-an, ang Babilonya.​—Isa 3:1-3; 8:​19, 20; 44:​24, 25; 47:9-15; Jer 14:14; 27:9; 29:8; Eze 13:6-9, 23; Miq 3:6-12; Zac 10:2.

Ang pagpanag-an kaylap usab kaayo sa mga adlaw sa mga apostoles ni Jesus. Didto sa pulo sa Cipro, ang usa ka barangan nga ginganlag Bar-Jesus gibutaan tungod sa iyang pagbabag sa pagsangyaw ni apostol Pablo; ug didto sa Macedonia, si Pablo nagpagula sa demonyo sa pagpanag-an gikan sa usa ka samokan nga batan-ong babaye, nga nakapalagot pag-ayo sa iyang mga agalon kinsa nakasapi ug dako tungod sa iyang okultong gahom sa pagpanag-an. (Buh 13:6-11; 16:16-19) Apan ang uban, sama kang Simon sa Samaria, kinabubut-ong mibiya sa ilang mga kalaki sa salamangka, ug sa Efeso didtoy daghan kaayo nga misunog sa ilang mga basahon sa pagpanag-an nga ang bili niini  mikabat ug 50,000 ka pirasong plata (kon denario, $37,200).​—Buh 8:9-13; 19:19.

Ang kinaiyanhong tinguha sa tawo sa pagkahibalo sa umaabot mabatonan lamang kon siya mosimba ug moalagad sa iyang Dakong Maglalalang, tungod kay pinaagi sa galamiton sa Diyos sa pagpakigkomunikar, Siya mahigugmaong nagpadayag nang daan kon unsay angayng mahibaloan sa tawo. (Am 3:7) Apan sa dihang ang mga tawo motalikod kang Jehova ug mahimulag gikan sa Usa nga bugtong nahibalo sa kataposan sukad sa sinugdanan, sila daling mabiktima sa impluwensiya sa mga demonyo. Ang usa ka dayag nga pananglitan niini mao si Saul, nga sa sinugdan misalig kang Jehova sa pagbatog kahibalo bahin sa umaabot nga mga hitabo apan kinsa, human nga ang Diyos wala na makiglabot kaniya tungod sa iyang pagkadili-matinumanon, midangop sa mga demonyo ingong kapuli sa paggiya sa Diyos.​—1Sa 28:​6, 7; 1Cr 10:​13, 14.

Busa, adunay dakong kalainan tali sa gipadayag nga kamatuoran gikan sa Diyos ug sa impormasyon nga mabatonan pinaagi sa pagpanag-an. Kadtong modangop sa pagpanag-an sagad nga makasinatig grabeng pagpangurog tungod sa dili-makitang mga gahom sa demonyo, usahay sila magsalimuang tungod sa mahikanhong musika ug pipila ka droga. Walay ingon niana nga mga kadaot sa pisikal o mental ang nasinatian sa matuod nga mga alagad ni Jehova sa dihang gipalihok sila sa balaang espiritu sa pagsulti. (Buh 6:15; 2Pe 1:21) Ang mga manalagna sa Diyos agig pagtuman sa ilang katungdanan gawasnong nagasulti nga walay bayad; ang paganong mga mananag-an naggamit sa ilang kalaki alang sa hinakog ug personal nga benepisyo.

Ang Bibliya negatibong naghisgot sa bisan unsang matang sa pagpanag-an. Diha sa daghang teksto diin gihukman kini, ang espiritistikanhong mga buhat sa pagpanag-an gihisgotan uban sa pagpanapaw ug pakighilawas. (2Ha 9:22; Nah 3:4; Mal 3:5; Gal 5:​19, 20; Pin 9:21; 21:8; 22:15) Sa mga mata sa Diyos, ang pagpanag-an maoy sala nga sama sa rebelyon. (1Sa 15:23) Busa, dili kasulatanhong isipon nga ang pagpakigkomunikar ni Jehova sa iyang mga alagad maoy usa ka pamatuod sa “maayo” nga pagpanag-an.

Si Jehova nagpakyas sa mga mananag-an. Ang walay-kinutobang gahom ni Jehova kon itandi sa limitado kaayong gahom nga gipasundayag sa salamangkerong mga mananag-an nadayag sa kasinatian ni Moises ug Aaron sa atubangan ni Paraon. Sa dihang ang sungkod ni Aaron nahimong bitin, ang mga salamangkerong Ehiptohanon daw nakahimo usab sa maong abilidad. Apan pagkadako sa ilang kaulawan sa dihang ang sungkod ni Aaron milamoy sa mga sungkod sa maong mga barangan! Ang mga saserdoteng Ehiptohanon daw nakaarang usab sa paghimo sa tubig nga dugo ug sa pagpatunghag mga baki ibabaw sa yuta. Apan sa dihang gipahinabo ni Jehova nga ang abog mahimong mga tagnok, ang mga barangan nga may tinagong mga kalaki napugos sa pagdawat nga kini nahimo pinaagi sa “tudlo sa Diyos.”​—Ex 7:8-12, 19-22; 8:5-11, 16-19; 9:11.

Gisugo sa daotang si Haman nga ‘adunay usa [dayag nga usa ka astrologo] nga maghulog sa Pur, nga mao, ang Ripa, sa adlaw-adlaw ug sa bulanbulan,’ aron matino ang labing maayong panahon sa paglaglag sa katawhan ni Jehova. (Est 3:7-9) Mahitungod niini nga teksto, ang usa ka komentaryo nag-ingon: “Sa paggamit niini nga paagi sa pagtino sa labing maayong adlaw aron buhaton ang iyang mananapon nga laraw, gihimo ni Haman ang sama sa kanunayng himoon sa mga hari ug mga hamili sa Persia, nga dili mobuhat sa bisan unsang kalihokan nga dili mokonsulta una sa mga astrologo, ug makombinsir nga mao na kana ang suwerte nga takna.” (Commentary on the Whole Bible, ni Jamieson, Fausset, ug Brown) Pinasukad niini nga pagpanag-an, gisugdan dayon ni Haman ang iyang daotang laraw. Apan sa makausa pa, gipasundayag ni Jehova ang iyang gahom sa pagluwas sa iyang katawhan, ug si Haman, nga misalig sa pagpanag-an, gibitay sa mismong estaka nga iyang giandam alang kang Mardokeo.​—Est 9:​24, 25.

Ang laing pananglitan nga mas labaw ang gahom ni Jehova kay sa okultong mga gahom maoy sa dihang ang mga Moabihanon miabot “nga dala ang bayad alang sa pagpanag-an” aron suholan si Balaam nga usa ka mananag-an sa Mesopotamia sa pagtunglo sa Israel. (Num 22:7) Bisan tuod si Balaam naningkamot nga “makakaplag ug daotang mga tilimad-on,” gipahinabo ni Jehova nga mga panalangin lamang ang iyang ipamulong. Sa usa sa iyang mga panultihon si Balaam, ilalom sa kusganong gahom ni Jehova, miadmitir: “Walay kalaki nga makadaot batok kang Jacob, ni bisan unsang pagpanag-an batok sa Israel.”​—Num kap 23, 24.

“Espiritu ni Python.” Didto sa Filipos sa Macedonia nahibalag ni Pablo ang usa ka sulugoong babaye nga gigamhan sa ‘usa ka espiritu, usa ka demonyo sa pagpanag-an,’ sa literal, “usa ka espiritu ni python” (Gr., pneuʹma pyʹtho·na; Buh 16:16). Ang “Python” mao ang ngalan sa mitolohikanhong bitin nga nagbantay sa templo ug sa orakulo sa Delphi sa Gresya. Ang pulong nga pyʹthon sa ngadtongadto nagtumong sa usa ka tawo nga makatag-an sa umaabot ug usab sa espiritu nga namulong pinaagi kaniya. Bisan tuod sa ulahi kini gigamit sa pagtumong sa usa ka ventriloquist o usa  nga nagasulti pinaagig kikokiko o laing butang, dinhi sa Mga Buhat kini gigamit sa pagtumong sa usa ka demonyo nga maoy nagpahinabo sa usa ka batan-ong babaye nga makahimog kalaki sa pagpanag-an.