Ang pagtigom ug paghipos sa bisan unsang bahin sa abot nga tinuyong gibilin o nahibilin nga wala tuyoa sa mga mangangani. Ang balaod sa Diyos ngadto sa Israel espesipikong nagsugo sa iyang katawhan nga dili hutdon pag-ani ang mga daplin sa ilang mga uma, nga dili hagdawan ang mga sanga sa kahoyng olibo human aniha ang mga bunga niini pinaagi sa pagdughit o pagbunal sa kahoy, ni hagdawan ang ilang mga parasan. Bisan pag usa ka binangan nga uhay ang nahibilin nga wala tuyoa diha sa umahan, kini dili kuhaon. Ang pagpanghagdaw mao ang hinatag-sa-Diyos nga katungod sa mga kabos sa yuta, sa sinakit, sa langyaw nga pumoluyo, sa bata nga ilo-sa-amahan, ug sa balo.​—Lev 19:​9, 10; Deu 24:19-21.

Ang asoy bahin kang Ruth naghatag ug talagsaong pananglitan kon giunsa pagpadapat kining mahigugmaong probisyon sa balaod sa Diyos. Bisan tuod adunay katungod sa pagpanghagdaw, si Ruth nangayo ug pagtugot sa tigdumala sa mga mangangani aron siya makapanghagdaw, ug lagmit mao kini ang nabatasan sa mga manghahagdaw. Si Ruth gipakitaan ug kalulot, ug gisugo pa gani ni Boaz ang iyang mga mangangani sa pagbugnot ug pipila gikan sa mga binangan sa uhay ug nagbilin niini aron mahagdaw ni Ruth. Bisan tuod kini nagpasayon alang kang Ruth, nagkinahanglan gihapon kini ug paningkamot sa iyang bahin. Siya puliking nanghagdaw sunod sa mga mangangani ni Boaz gikan sa buntag hangtod sa pagkagabii, nga mopahulay lamang sa makadiyot diha sa balay ug moundang lang aron mokaon.​—Ru 2:5-7, 14-17.

Dayag nga kining maayong kahikayan alang sa mga kabos sa yuta, samtang nagdasig sa pagkamahinatagon, pagkadili-mahakogon, ug pagsalig sa panalangin ni Jehova, wala gayod mag-aghat sa pagkatapolan. Kini nagpatin-aw sa gipahayag ni David: “Wala ako makakita ug matarong nga gibiyaan sa bug-os, ni sa iyang kaliwat nga nagapangita ug tinapay.” (Sal 37:25) Pinaagi sa ilang pagpahimulos sa probisyon nga gihimo sa Balaod alang kanila, bisan ang mga kabos, tungod kay naghago, dili magutman, ni sila o ang ilang mga anak magpakilimos ug tinapay.

Mahulagwayon ug Masambingayong mga Paggamit. Sa dihang ang mga Epraimnon nag-akusar kang Gideon tungod kay sila wala ipatawag aron makig-away sa Midian sa pagsugod pa lang sa gubat, si Gideon miingon: “Dili ba ang pagpanghagdaw sa Epraim maayo pa kay sa pagpamupo ug ubas sa Abi-ezer [ang banay diin sakop si Gideon]?” Iyang gipatin-aw kini nga sambingay pinaagi sa pag-ingon nga ang nahimo sa Epraim (bisan tuod ulahi ra silang nakiggubat) sa pagdakop sa Midianhong mga prinsipe nga si Oreb ug Zeeb mas labaw pa gayod kay sa tanan nga nahimo ni Gideon. (Huk 8:1-3; 6:11) Gipakasama usab sa Kasulatan ang pagpamatay sa mga nahibilin sa gubat human sa aktuwal nga panagsangka ingong pagpanghagdaw o ‘pagpanghipos.’ (Huk 20:​44, 45) Ang mga nahibilin human sa pagpahamtang ni Jehova sa iyang paghukom gipakasama sa ‘hinagdaw sa dihang natapos na ang pagpamupo sa ubas,’ ug gipakasama usab ni Miqueas ang mga nahibilin sa panulondon sa Diyos nga anaa taliwala sa katawhang dunot sa moral ingong “hinagdaw sa pagpamupo sa ubas.”​—Isa 24:13; Miq 7:1-8, 18; itandi ang Jer 6:9; 49:​9, 10.