Ang paghunong sa usa ka tawo gikan sa pagtrabaho o sa pipila ka aspekto niini.

Sa dihang gitudlo ang mga Levihanon (dili gikan sa saserdotehanong banay ni Aaron) aron sa pag-alagad diha sa tolda nga tagboanan ubos sa pagdumala sa mga saserdote, si Jehova naghimog mahigugmaong mga tagana alang sa ilang kaayohan. Siya misugo kang Moises: “Kini mao ang nahiangay sa mga Levihanon: Gikan sa kawhaag-lima ka tuig ang kagulangon pataas siya moduyog sa pundok nga nagaalagad sa tolda nga tagboanan. Apan paglapas sa kalim-an ka tuig ang kagulangon siya moretiro na gikan sa pundok nga nagaalagad ug dili na mag-alagad. Ug siya mag-alagad sa iyang mga igsoon diha sa tolda nga tagboanan sa pag-atiman sa obligasyon, apan dili siya magbuhat ug pag-alagad.”​—Num 8:23-26; 1Cr 23:3.

 Sa Numeros kapitulo 4 gihubit ang pag-organisar sa mga Levihanon alang sa pag-alagad. Diha niana gihisgotan nga sila irehistro gikan sa pangedaron nga 30 hangtod sa 50.

Kadto maoy usa ka bug-at nga trabaho sa pagpatindog, pagbungkag, ug pagdala sa tolda nga tagboanan. Ang 96 ka suksokanang patongan nga ginama sa plata alang sa mga kuwadrong bayanan mitimbang ug usa ka talanton (mga 34 kg) ang matag usa; dihay upat usab ka patongan alang sa mga haligi taliwala sa Balaan ug sa Labing Balaan nga mga lawak, nga lagmit pareho niini ug timbang, ug lima ka patongan nga tumbaga alang sa mga haligi sa ganghaan sa tabernakulo. (Ex 26:​19, 21, 25, 32, 37; 38:27) Ang 48 ka kuwadrong bayanan (4.5 m [14.6 p] ang gitas-on; 67 sm [26 pul.] ang gilapdon) maoy ginama sa akasya, usa ka pinog-grano nga bug-at nga kahoy, nga hinaklapan ug bulawan. (Ex 26:15-25, 29) Dihay mga balabag nga hinaklapan ug bulawan nga gibabag latas sa matag kiliran ug sa likod sa tabernakulo. (Ex 26:26-29) Bug-at kining tanang mga butanga. Dugang pa, medyo bug-at usab ang mga tabon nga panit sa poka, panit sa laking karnero, balhibo sa kanding, ug lino, ingon man usab ang tabil nga lino palibot sa sawang, lakip ang mga haligi, mga suksokanang patongan, mga ugsok sa tolda niini, ug uban pa. Busa ang pagdala sa tabernakulo nagkinahanglan ug dakong kahago. (Ex 26:1-14; 27:​9-19) Gitagana ang unom ka karomata aron kargahan niining mga butanga. Ang gitabonan nga arka sa pakigsaad, ang lamesa sa pasundayag nga tinapay, ang bulawan nga tangkawan, ug ang hinaklapan ug tumbaga nga halaran pas-anon sa mga Kohatnon samtang maglakaw sila.​—Num 7:7-9; Ex 25:10-40; 27:1-8; Num 4:​9, 10.

Ang laing katuyoan sa kahikayan sa pagretiro maoy aron sa paghatag sa tanang Levihanon sa kahigayonan nga makabaton ug tinudlong mga buluhaton diha sa sangtuwaryo, tungod kay diyutay lamang ang gikinahanglan, ilabina sa dihang ang tolda nga tagboanan o tabernakulo mao pa ang gigamit. Walay pagretiro alang sa mga saserdote, ang mga Levihanon sa banay ni Aaron.

Dayag nga dihay lima ka tuig nga yugto gikan sa panuigon nga 25 ngadto sa 30 diin ang Levihanon nag-alagad sa kon unsay matawag nga “pagbansay.” Lagmit nga kini nga mga batan-on wala gamita alang sa bug-at nga mga buluhaton, nga gitagana lamang alang niadtong 30 anyos ug mas magulang pa niini​—sa hingkod na nga mga lalaki. (Tan-awa ang EDAD, PANAHON.) Sa ulahi, human nga ang Arka permanenteng nahimutang diha sa Bukid sa Zion (ug ilabina nga hapit nang tukoron ang templo nianang tungora), wala na ang bug-at nga buluhaton sa pagpas-an sa sangtuwaryo. Busa gihikay ni David nga ang mga Levihanon magsugod sa pag-alagad sa pangedarong 20. Sa walay duhaduha kini gihimo tungod kay sa templo mas daghan ang gikinahanglan sa pag-atiman sa midako kaayo nga mga buluhaton didto.​—1Cr 23:24-27.

Ang mga Levihanon nga miretiro sa pangedarong 50 wala moretiro gikan sa tanan nga buluhaton. Sila sa gihapon makaalagad nga boluntaryo ug “mag-alagad sa [ilang] mga igsoon diha sa tolda nga tagboanan sa pag-atiman sa obligasyon.” (Num 8:26) Lagmit sila nag-alagad ingong mga magtatambag ug mitabang sa pag-atiman sa pipila sa gaan nga mga buluhaton nga lakip sa obligasyon sa mga Levihanon, apan sila dili na paapilon sa bug-at nga mga buluhaton. Ug sila mga magtutudlo gihapon sa Balaod ngadto sa katawhan. (Deu 33:8-10; 2Cr 35:3) Kadtong ingon usab nila nga nagpuyo diha sa mga siyudad nga dalangpanan makatabang niadtong modangop didto.

Ang Kristohanong Ministeryo. Kadtong nahimong espirituwal nga “mga igsoon” ni Jesu-Kristo ug mga sumusunod sa iyang tunob gitawag nga “usa ka harianong pagkasaserdote.” (Heb 2:10-12; 1Pe 2:9) Alang kanila, walay probisyon alang sa pagretiro. Si apostol Pablo madasigon sa iyang ministeryo samtang nabilanggo ug nagpadayon sa buluhatong pagministeryo hangtod nga siya gipatay. (Buh 28:​30, 31; 2Ti 4:​6, 7) Si Pedro madasigon hangtod sa kataposan sa iyang kinabuhi. (2Pe 1:13-15) Gisulat ni Juan ang iyang Ebanghelyo ug ang tulo ka kanonikal nga mga sulat sa dihang siya tigulang na kaayo, sa mga 98 K.P.

Ang “dakong panon,” nga nakita ni Juan human sa panan-awon bahin sa 144,000 ka “gitimbrehan,” giingon nga “nagahatag [sa Diyos] ug sagradong pag-alagad adlaw ug gabii,” o mapinadayonon. Busa walay pagretiro sa pag-alagad sa Diyos alang sa bisan kinsa nga Kristohanon.​—Pin 7:​4, 9, 15.