Ang pagsamadsamad sa unod o paggarasgaras sa mga bukton, mga kamot, ug nawong sa mga panahon sa pagbangotan dayag nga maoy komon nga batasan taliwala sa mga tawo sa kakaraanan. (Jer 47:5; 48:37) Kini lagmit nga gihimo aron sa pagpahimuot o paglukmay sa mga bathala nga gituohang nagdumala sa mga patay. Bahin niini nga batasan taliwala sa mga Sityanhon inigkamatay sa ilang hari, ang Gregong historyador nga si Herodotus (IV, 71) misulat: “Sila mag-abis sa usa ka bahin sa ilang mga dalunggan, magkiskis sa ilang mga ulo, magsamadsamad lukop sa ilang mga bukton, magsisi sa ilang mga agtang ug mga ilong, ug magtusok sa ilang walang mga kamot pinaagig mga pana.”

Apan, ang pagsamadsamad sa lawas dili kay himoon lamang panahon sa mga rituwal sa pagbangotan. Kay naglaom nga tubagon sa ilang diyos ang ilang mga pangamuyo, ang mga manalagna ni Baal nagsamad sa ilang kaugalingon “sumala sa ilang kostumbre pinaagi sa mga baraw ug mga bangkaw, hangtod nga ilang napaagas ang dugo diha kanila.” (1Ha 18:28) Ang susamang mga rituwal gihimo usab sa ubang mga katawhan sa kakaraanan. Pananglitan, si Herodotus (II, 61) naghisgot nga panahon sa pista ni Isis, ang mga Carianhon nga nagpuyo sa Ehipto nagsamad sa ilang mga agtang ginamit ang mga kutsilyo.

Ang Balaod sa Diyos espesipikong nagdili sa pagsamadsamad sa unod alang sa mga patay. (Lev 19:28; 21:5; Deu 14:1) Tungod kini kay ang Israel maoy usa ka balaan nga katawhan alang kang Jehova, usa ka linaing katigayonan. (Deu 14:2) Tungod niana, ang Israel kinahanglang dili malangkit sa tanang idolatrosong mga buhat. Dugang pa, ang maong sobra nga mga pagpasundayag sa pagbangotan duyog sa tinuyong pagsamadsamad sa unod dili gayod haom alang sa usa ka katawhan nga bug-os nasayod sa aktuwal nga kahimtang sa mga patay ingon man sa paglaom sa pagkabanhaw. (Dan 12:13; Heb 11:19) Lain pa, ang pagdili sa tinuyong pagsamad sa kaugalingon magpatisok gayod sa mga Israelinhon sa tukmang pagtahod sa linalang sa Diyos, ang tawhanong lawas.

Apan, dayag nga may mga panahon nga gisupak sa mga Israelinhon ang balaod sa Diyos maylabot sa pagsamadsamad sa ilang unod.​—Jer 41:5; itandi ang Miq 5:1.