Pagpatapot o pagdugtong pinaagig mga tahi. Sukad pa sa kanhing kapanahonan ang pagtahi, lakip na ang pagborda, may dakong bahin sa mga kalihokan sa tawo. (Ex 26:1; 35:35; Job 16:15; Ecc 3:7; Eze 13:18) Ang unang lalaki ug babaye, si Adan ug Eva, “nagtahig mga dahon sa igos ug naghimog mga tapis sa ilang balat-ang.” (Gen 3:7) Kini mahimong nagpasabot lamang nga ilang gitapot ang dagkong mga dahon sa igos, ginamit ang gagmayng mga sanga sa igos.

Sa pagpatin-aw kon nganong ang iyang mga tinun-an wala magpuasa sama sa mga Pariseo ug sa mga tinun-an ni Juan, gihisgotan ni Kristo Jesus  nga ang pagtapak ug usa ka piraso sa wala-pa-mokulo nga panapton diha sa daang besti makapasamot sa gisi niini. (Mar 2:​18, 21) Kon labhan, ang tapak mokulo ug, sa dihang mahitabo kini, magbitad sa daang besti ug maggisi niini. Kini nga ilustrasyon angayng makatabang niadtong nakabati sa mga pulong ni Jesus nga masabtan nga panahon na nga sila mahimong iyang mga sumusunod ug nga maoy sayop nga ilang ipatuman ang ilang mga buhat ngadto sa mga tinun-an ni Jesus. Si Juan una pa niana nagpatin-aw nga ang iyang buluhaton maoy pag-andam sa pag-abot ni Kristo ug, busa, maoy temporaryo lamang.​—Ju 3:27-30.