Usa ka taas-ug-kuptanan nga galamiton nga pangkandos. Ang mga pala nga ginama sa tumbaga gigamit didto sa tabernakulo aron sa pagkuha sa mga abo gikan sa halaran sa halad-nga-sinunog. (Ex 27:1-3; 38:3; Num 4:14) Gigamit sa samang katuyoan mao ang mga pala nga tumbaga nga gihimo sa Hebreohanon-Fenicianhon nga artesano nga si Hiram aron gamiton sa templo nga gitukod ni Solomon. (1Ha 7:​13, 14, 40, 45) Lakip kini sa mga galamiton sa templo nga gidala sa mga Babilonyanhon niadtong 607 W.K.P.​—2Ha 25:​8, 14; Jer 52:18.

Ang mga pala, nga tingali gama gikan sa kahoy, gigamit sa pagpalid sa mga lugas. (Isa 30:24) Ang lapad nga igpapalid nga pala gigamit diha sa giokanan aron sa pagkandos sa giniok nga lugas ug isabwag kini ngadto sa hangin nga maoy magpalid sa mga hugawhugaw, sama sa tahop, ug sa ingon mahulog ang lugas diha sa giokanan. Si Juan nga Tigbawtismo sa matagnaong paagi naghulagway sa Mesiyas ingong nagbitbit ug mahulagwayong pala, nga pinaagi niini iyang lainon ang simbolikong “trigo” gikan sa “tahop.”​—Mat 3:​1, 12; tan-awa ang PAGPALID.