Ang Gregong termino nga prai·toʹri·on (gikan sa Lat., praetorium) nagtumong sa opisyal nga pinuy-anan sa Romanong mga gobernador. Sa palasyo sa gobernador didto sa Jerusalem, si Poncio Pilato nagsukitsukit kang Kristo Jesus, ug didto sa sawang niini, ang Romanong mga sundalo nagyagayaga kaniya. (Mar 15:16; Ju 18:​28, 33; 19:9) Gituohan sa pipila nga ang palasyo sa gobernador mao ang Torre sa Antonia, apan gihunahuna sa uban nga lagmit  kadto mao ang palasyo nga gitukod ni Herodes nga Bantogan. Ang mosunod nga mga katarongan gipresentar sa pagpaluyo sa ulahing panglantaw: (1) Sumala sa unang-siglong Hudiyong pilosopo nga si Philo (The Embassy to Gaius, XXXIX, 306), ang palasyo ni Herodes gitawag nga “ang balay sa mga gobernador,” ug didto sa maong palasyo nga si Gobernador Pilato nagbitay ug mga taming ingong pasidungog kang Tiberio Cesar. (2) Ang Hudiyong historyador nga si Josephus nagtaho nga ang prokurador nga si Gessius Florus didto nagpuyo. (The Jewish War, II, 301 [xiv, 8]) (3) Ang palasyo ni Herodes didto sa Cesarea nagsilbing palasyo sa gobernador sa maong siyudad.​—Buh 23:33-35.

Ang palasyo ni Herodes didto sa Jerusalem nahimutang sa AK nga bahin sa ibabaw nga siyudad, nga mao, sa habagatang bahin sa siyudad. Sumala sa paghubit ni Josephus, gilibotan kini ug paril nga 30 ka maniko (13 m; 44 p) ang gihabogon nga may mga torre nga parehog mga distansiya. Sulod sa mga paril dihay mga portiko, mga sawang, ug kakahoyan. Ang mga lawak maluhong gidayandayanan ug bulawan, plata, ug mga butang nga marmol. Dihay mga lawak-higdaanan alang sa usa ka gatos ka bisita.​—Jewish Antiquities, XV, 318 (ix, 3); The Jewish War, V, 173-182 (iv, 4).