Panaglantugi, panagbangi, panagtigi sa usag usa tungod sa pagdumot. Usa ka Hebreohanong berbo nga gihubad nga “nakig-away” gihubad usab nga “nagsugnib” ug “nag-aghat.” Lakip sa mga hinungdan sa panag-away nga gihisgotan sa Kasulatan mao ang pagdumot (Pr 10:12), kasuko (Pr 15:18; 29:22), mga intriga (Pr 16:28), biaybiay (Pr 22:10), pagpalabig inom (Pr 23:​29, 30), pagbutangbutang (Pr 26:20), pagpanghambog o garbo, ug kakulang sa hustong pagtudlo (Pr 28:25; 1Ti 6:​3, 4). Ang panag-away makadaot sa kalinaw ug kalipay. Sublisubling gipasiugda diha sa basahon sa Mga Proverbio nga kini adunay dili maayong epekto ug makapahilayo sa usag usa. (Pr 19:13; 21:​9, 19; 25:24; 27:15) Ang mga panaglalis tali niadtong kanhi adunay inigsoong relasyon mahimong mopatunghag dako kaayong babag sa panag-uliay. “Ang usa ka igsoon nga gihimoag kalapasan labi pang malisod nga dag-on kay sa usa ka malig-on nga lungsod; ug may mga panaglalis nga sama sa trangka sa usa ka puloy-anang torre.”​—Pr 18:19.

Ingong usa sa mga buhat sa unod nga gidumtan ni Jehova (Gal 5:​19, 20; itandi ang Pr 6:19; Rom 1:​28, 29, 32; San 3:14-16), ang panag-away o panaglalis walay dapit diha sa Kristohanong kongregasyon. (Rom 13:13; 1Co 3:3; 2Co 12:20; Flp 2:3; Tit 3:9) Usa sa mga kuwalipikasyon alang sa Kristohanong magtatan-aw mao nga siya dili usa ka tawong palaaway. (1Ti 3:​1, 3) Busa, ang mga tawong padayong nakiglalis o nakig-away maoy lakip niadtong makadawat sa bug-at nga paghukom sa Diyos.​—Rom 2:​6, 8.

Sa unang siglo K.P., si apostol Pablo kinahanglang makigtigi sa mga palaaway. Ang pipila nagmantala sa maayong balita tungod sa pagkamatigion, lagmit nagtinguha nga mahimong ilado ug ipaubos ang awtoridad ug impluwensiya ni Pablo. Apan kini wala tugoti ni Pablo nga makawala sa iyang kalipay nga makitang ang Kristo namantala.​—Flp 1:15-18.