Usa ka talan-awon o esena nga mipatim-aw sa hunahuna sa usa ka tawo sa adlaw o sa gabii, nga sagad ipadayag sa talagsaong paagi, ug usahay sa dihang ang nakadawat niini napunawan o nagdamgo. (Buh 10:3; Gen 46:2) Sagad lisod ang pagtino sa dayag nga kalainan tali sa mga panan-awon ug mga damgo nga gihubit sa Bibliya, ug usahay gilangkob kining duha.

Kon nagmata ang usa ka tawo nga nakadawat ug panan-awon gikan sa Diyos, mopatim-awng kini gihulma diha sa iyang nakaamgo nga hunahuna. Ang panan-awon mahimong mahinumdoman ug mahubit o matala sa ulahi sa nakadawat niini pinaagi sa iyang kaugalingong mga pulong. Ang pipila ka tawo, sama kang Daniel ug Nabucodonosor, nakakita usab ug “mga panan-awon sa gabii.” Kini nga mga panan-awon mopatim-awng gihulma diha sa handurawan sa nakadawat niini samtang siya natulog.

Pagpunaw. Dayag usahay nga gihulma sa espiritu sa Diyos diha sa hunahuna ang larawan sa katuyoan sa Diyos o ang usa ka panan-awon samtang ang usa ka tawo gipunawan, usa ka kahimtang sa halawom nga pagpamalandong o sa usa ka kahimtang nga samag natulog. Ang Gregong pulong nga gihubad nga “gipunawan” diha sa Kristohanong Kasulatan mao ang ekʹsta·sis. Kay literal nga gihubad ingong usa ka pagsalikway o paghiklin, kini adunay mahulagwayong diwa nga pagsalindot sa normal nga kahimtang sa hunahuna. Ang usa ka indibiduwal nga gipunawan mahimong walay kalibotan sa iyang literal nga palibot ug mahimong mosanong sa usa ka panan-awon.​—Buh 22:​17, 18.

Mga Pasalig sa Pag-uyon sa Diyos. Ang pipila ka panan-awon nga gikan sa Diyos gipadayag ngadto sa mga alagad ni Jehova kon sa unsang paagi siya nakiglabot kanila ug nagpasalig kanila sa iyang pag-uyon. Ang pulong ni Jehova midangat kang Abram (Abraham) diha sa panan-awon, ug nagpasalig sa patriarka: “Ayaw kahadlok, Abram. Ako usa ka taming alang kanimo. Ang imong ganti mahimong dako kaayo.” (Gen 15:1) Human niana, si Jehova nakigsaad kang Abraham. (Gen 15:2-21) Pipila ka tuig sa ulahi, ang Diyos nakigsulti kang Jacob diha sa mga panan-awon sa kagabhion, nga nagsulti kaniya nga dili mahadlok sa paglugsong sa Ehipto, tungod kay ang Diyos maghimo kaniya nga usa ka dakong nasod didto ug sa kataposan magdala kaniyag balik gikan nianang yutaa.​—Gen 46:1-4; itandi ang 2Sa 7:1-17; 1Cr 17:1-15.

Pagtultol Aron sa Pagbuhat sa Katuyoan sa Diyos. Ang pipila ka panan-awon nga gikan sa Diyos naghatag sa mga nakadawat niini ug pagtultol aron sa pagbuhat sa kabubut-on ni Jehova. Human nga ang hinimayang si Jesu-Kristo nagpakita kang Saulo sa Tarso, si Saulo, bisan tuod temporaryong gibutaan, nakakitag panan-awon diin iyang nakita ang usa ka tawo nga ginganlag Ananias nga nagtapion sa iyang mga kamot kaniya aron maulian siya sa iyang panan-aw. Pinaagi usab sa usa ka panan-awon, si Ananias gitultolan ngadto mismo sa balay sa Damasco diin didto si Saulo.​—Buh 9:1-19.

Sa Cesarea niadtong 36 K.P., ang debotadong Hentil nga si Cornelio nakakitag usa ka panan-awon diin ang usa ka manulonda nagsulti kaniya nga magpasugo ngadto sa Jope aron ipatawag si Simon Pedro. (Buh 10:1-8) Didto sa Jope, si Pedro gipunawan ug nakakitag usa ka panan-awon diin iyang nakita ang usa ka sudlanan nga gitunton gikan sa langit nga nasudlan sa nagkadaiyang dili-hinlong mga linalang. Pinaagi niini ang apostol gitudloan nga dili niya isipon nga mahugaw ang mga butang nga gihinloan na sa Diyos. Kini nag-andam kang Pedro aron sugdan ang buluhaton sa pagwali sa maayong balita ngadto sa dili-tinuling mga Hentil.​—Buh 10:9-23; 11:5-12.

Ang pagtultol sa Diyos bahin sa buluhatong pagwali gihatag usab kang Pablo pinaagig mga panan-awon. Didto sa Troas, panahon sa ikaduhang misyonaryong panaw ni Pablo, sa kagabhion ang apostol nakakitag usa ka panan-awon diin dihay usa ka tawong Macedonianhon nga nangaliyupo: “Dali ngari sa Macedonia ug tabangi kami.” (Buh 16:8-12) Sa ulahi, tungod sa usa ka makapadasig nga panan-awon sa kagabhion diin ang Ginoo  nakigsulti kaniya, ang apostol nagpabilin sa Corinto sulod sa usa ka tuig ug unom ka bulan, nga nanudlo sa Pulong sa Diyos.​—Buh 18:8-11.

Tagna. Ang pipila ka panan-awon nga gikan sa Diyos maoy matagnaon o gihatag aron ang makadawat niini makahimo sa paghubad sa mga tagna nga gipadayag pinaagig mga panan-awon ug mga damgo. Si manalagnang Daniel “adunay pagsabot sa tanang matang sa mga panan-awon ug sa mga damgo.” (Dan 1:17) Maoy diha sa “usa ka panan-awon sa kagabhion” nga gipadayag sa Diyos ngadto kang Daniel ang unod ug kahulogan sa damgo ni Haring Nabucodonosor bahin sa usa ka dako kaayong larawan nga naghulagway sa mga gahom sa kalibotan.​—Dan 2:​19, 28; itandi ang Dan 4:​5, 10, 13, 20-22.

Diha sa usa ka matagnaong damgo ug “mga panan-awon sa gabii,” si Daniel nakakitag upat ka dagko kaayong mga mananap nga migula gikan sa dagat, nga nagpakita nga upat ka “hari” ang mobarog gikan sa yuta. (Dan 7:1-3, 17) Ang manalagna nakapribilehiyo usab nga makita diha sa panan-awon ang “sama sa anak sa tawo” nga nakadawat ug pagmando, dignidad, ug gingharian gikan sa Karaan sa mga Adlaw.​—Dan 7:​13, 14.

Ang mga panan-awon nga gikan sa Diyos nadawat usab sa mga magsusulat sa Bibliya sama kang Isaias (1:1; 6:1-13), Amos (7:1-9, 12; 8:​1, 2), ug Ezequiel (1:1). Ang inspirado nga matagnaong kapahayagan ni Abdias batok sa Edom gibuksan pinaagi niining mga pulonga: “Ang panan-awon ni Abdias.” (Abd 1) Ang “panan-awon ni Nahum” naundan sa kapahayagan batok sa Nineve.​—Nah 1:1.

Ang basahon sa Pinadayag naundan sa sunodsunod nga mga panan-awon nga nakita sa tigulang nga si apostol Juan. Ang Gregong ngalan sa basahon, A·po·kaʹly·psis, nga nagkahulogang “Pagpadayag” o “Pagbutyag,” maoy haom, sanglit ang Pinadayag nagpadayag sa mga butang, nagbutyag sa daghang mga panghitabo sa halayong umaabot, nga halayo pa kaayo gikan sa panahon sa pagsulat niini.​—Pin 1:​1, ftn sa Rbi8.

Bakak nga mga Panan-awon. Sa wala pa malaglag ang Jerusalem niadtong 607 W.K.P., ang mini nga mga manalagna sa siyudad nagsulti ug “panan-awon sa ilang kaugalingong kasingkasing,” sa ato pa, ang ilang mga mensahe wala maggikan kang Jehova. (Jer 23:16) Sanglit dili man gikan kang Jehova, ang panan-awon nga ilang gipahayag walay pulos. (Lam 2:​9, 14) Tungod kay sila nagsulti ug kabakakan ug ‘nagpahayag ug bakak nga panan-awon,’ si Jehova maoy batok kanila.​—Eze 13.

Ang Pipila Gitagna nga Makakita ug mga Panan-awon. Kasukwahi sa bakak nga mga panan-awon ug dugang pa sa hinatag-sa-Diyos nga mga panan-awon nga nahisgotan na, si Joel giinspirar sa Diyos sa pagtagna nga, ubos sa pagtultol sa espiritu sa Diyos, ang batan-ong mga lalaki “makakita ug mga panan-awon.” (Joe 2:28) Gipakita ni Pedro nga natuman kining tagnaa sa adlaw sa Pentekostes 33 K.P., sa dihang ang balaang espiritu gibubo diha sa mga sumusunod ni Jesu-Kristo ug sa milagrosong paagi sila nagpahayag “sa halangdong mga butang sa Diyos” diha sa daghang pinulongan.​—Buh 2:1-4, 11, 15-17.