Ang Hebreohanong pulong nga ʼit·timʹ maoy gigamit diha sa Isaias 19:3 sa pagtumong sa “mga maglalamat” sa Ehipto. Ang Hebreohanong pulong nga cheʹver (gihubad nga “kalaki sa salamangka,” “panglamat”) nagtumong sa orasyon nga giyamyam, giawit, o gisulat ingong kalaki sa salamangka o panglamat aron ‘lamaton’ ang usa ka tawo. (Sal 58:5; Isa 47:​9, 12) Ang “mga pahiyas sa kinhason nga mohugong” nga gipanag-iya, ug sa walay duhaduha gisul-ot sa mga anak nga babaye sa Zion tataw nga maoy mga panglamat, maingon nga ang Hebreohanong pulong nga gigamit sa pagtumong niini (lecha·shimʹ) naggikan sa lintunganayng pulong nga nagkahulogang “hunghong; lamat.” (Isa 3:20; itandi ang 2Sa 12:19; Sal 58:5.) Ang maong espiritistikanhong mga buhat maoy lakip sa “dulumtanang mga butang” nga gidili ni Jehova nga buhaton sa iyang katawhan. (Deu 18:9-11) Ang karaang mga Babilonyanhon, mga Ehiptohanon, ug ang uban pa gibantog sa ilang pagsalig sa mga panglamat ug pagpangdaot.​—Isa 19:3; 47:9, 12.

Paglamat sa Bitin. Ang gitawag nga paglamat sa bitin mahimong maoy usa ka matang sa espiritismo ug maoy kabilin sa karaang kulto sa mga magsisimba sa halas. Ang maglalamat gituohan nga molamat sa halas, nga sagad usa ka kobra, busa mopatim-awng kini malamat pinaagi sa pagpatokar ug musika, nga sagad ginamit ang alpa o plawta. Ang mga bitin dili bungol o maglisod sa pagpamati sama sa gihunahuna sa uban, apan ingon sa gipasabot sa Salmo 58:4, 5, sila makadungog sa tingog sa mga maglalamat ingon man sa musika. Hunahunaon tingali sa usa nga kini maoy usa ka estratehiya lamang sa pagbansay sa bitin sama sa pagbansay ug usa ka hayop o langgam, pinaagi sa pagbutang niini diha sa bukag nga may taklob, sa pagpatokar ug mananoy nga musika, nga isira dayon ang taklob kon buot niining moeskapo, hangtod nga ang bitin sa kataposan makakat-on sa pagbarog nga tul-id agig pagsunod sa musika nga dili mosulay sa pag-eskapo. Bisan tingali tinuod kini sa pipila ka kahimtang, ang espiritistikanhong mga puwersa kasagarang dayag nga nalangkit sa paglamat sa bitin.

Ang paghisgot niining espiritistikanhong buhat diha sa Bibliya nagpamatuod nga dugay na kining gibuhat.​—Sal 58:4, 5; Ecc 10:11; Isa 3:3; Jer 8:17.