Ang panggawas nga putos sa lawas sa usa ka tawo o sa hayop. Ang panit giklasipikar ingong organo sa lawas, ug sa pagkatinuod kini adunay daghang gamit alang sa kaayohan sa lawas, lakip ang proteksiyon, pagkontrolar sa temperatura sa lawas, ug sa pagwagtang sa pipila ka hugaw sa lawas.

Ang Bibliya naghisgot sa mga sakit sa panit (Lev 13:1-46; 21:20; Deu 28:27) ug sa makapaut-ot nga mga epekto sa sakit ug sa gutom diha sa panit.​—Job 7:5; 30:30; Lam 4:8; 5:10.

Sumala sa Balaod, ang mga panit sa mga hayop nga gigamit alang sa halad-sa-sala pagasunogon sa gawas sa kampo sa Israel, o sa gawas sa ganghaan sa Jerusalem. (Ex 29:14; Lev 4:​11, 12; 8:17; 9:11; 16:27; Heb 13:11) Dawaton sa saserdote ang panit sa usa ka hayop nga itanyag sa usa ka Israelinhon alang sa halad-nga-sinunog.​—Lev 7:8.

Si Jehova nagtagana ug panit nga besti alang kang Adan ug Eva aron sa pagtabon sa ilang pagkahubo, human sila makasala. (Gen 3:21) Ang mga panit nga wala kuhai ug mga balhibo gigamit ingong mga besti sa ubang mga tawo, ilabina sa pipila ka manalagna (2Ha 1:8), lakip sa pipila ka mini nga mga manalagna. (Zac 13:4) Ang mga panit sa hayop gihimo usab nga mga sandalyas (Eze 16:​3, 10); mga puntil (1Sa 17:40) ug mga sudlanan sa tubig, gatas, ug bino (Gen 21:14; Jos 9:13; Huk 4:19; Mat 9:17); ingong mga hapin sa tambol; ug lagmit ingong pang-ilalom nga hanig sa neʹvel o “kinuldasan nga tulonggon.” (Isa 5:12) Ang mga panit  gigamit ingong mga tabon alang sa tabernakulo.​—Ex 25:​2, 5; 26:14; 35:​7, 23; 36:19.

Ang panit sa mga karnero, kanding, o nating baka gigamit usab ingong sulatanan.​—Tan-awa ang PERGAMINO.

Mahulagwayong Paggamit. Mahitungod kang Job, si Satanas miingon kang Jehova: “Panit alang sa panit, ug ang tanang butang nga anaa sa usa ka tawo iyang ihatag tungod sa iyang kalag.” (Job 2:4) Busa gihagit sa Yawa ang integridad sa tawo, nga nag-ingon nga si Job magtunglo sa Diyos kon madaot ang iyang pisikal nga panglawas.

Si Job mismo miingon: “Ako nakalingkawas nga ingon lamang sa panit sa akong ngipon.” (Job 19:20) Ang mga maghuhubad adunay gihatag nga laing mga hubad niini nga teksto, apan kini nagkinahanglan ug mga kabag-ohan diha sa Hebreohanong teksto. Daw dili na kinahanglan nga paningkamotang ipatin-aw ang gipamulong ni Job pinasukad sa mga nadiskobrehan sa mga siyentipiko niining dili pa dugayng mga panahon pinaagi sa tabang sa mga mikroskopyo. Mopatim-aw nga si Job nag-ingon lamang nga siya halos wala makalingkawas o lugos nga makalingkawas. Siya nakalingkawas nga ingon lamang sa panit sa iyang ngipon, sa ato pa, uban sa “panit” nianang kon tan-awon walay panit.