Usa ka pormal nga parada sa pagsaulog sa kadaogan batok sa kaaway. Ang Gregong pulong nga thri·am·beuʹo, nga nagkahulogang “nanguna diha sa parada sa kadaogan,” makaplagan lamang kaduha diha sa Kasulatan, nga ang matag usa mopatim-awng gigamit sa magkalahi nga masambingayong kahimtang.​—2Co 2:14; Col 2:15.

Mga Parada sa Kadaogan Taliwala sa Kanasoran. Ang Ehipto, Asirya, ug ang ubang kanasoran nagsaulog sa ilang kadaogan sa gubat pinaagig mga parada sa kadaogan. Panahon sa republika sa Roma, ang usa sa kinatas-ang pasidungog nga ikahatag sa Senado ngadto sa usa ka mananaog nga heneral mao ang pagtugot kaniya nga saulogon ang iyang kadaogan pinaagig pormal ug gastoso nga parada nga naglakip sa tanang detalye sa pagpasigarbo ug paghimaya kaniya.

Ang Romanhong parada hinay nga moagi diha sa Via Triumphalis ug tungas sa naglikoliko nga dalan paingon sa templo ni Jupiter ibabaw sa Bungtod sa Capitoline. Nag-una ang mga maghohoni nga nagpatugtog ug nag-awit ug mga awit sa kadaogan, nga gisundan sa batan-ong mga lalaki nga nagguyod sa ighahalad nga mga baka. Dayon nagsunod ang bukas nga mga karomata nga gikargahan sa mga inilog sa gubat, ug daghang karosa nga naglarawan sa mga esena sa gubat o sa paglaglag sa mga siyudad ug mga templo, ug sa ibabaw niana lagmit may pigura sa napilding komandante. Ang mga hari, mga prinsipe, ug mga heneral nga nabihag sa gubat, uban sa ilang mga anak ug mga tig-alagad, guyoron nga kinadenahan, nga sagad gihuboan aron sila pakaulawan.

Sunod niana ang karo sa heneral, nga gidayandayanan ug garing ug bulawan, gilukongan ug lawrel, ug giguyod sa upat ka puting kabayo o, usahay, sa mga elepante, leyon, tigre, o mga osa. Ang mga anak sa mananaog molingkod sa iyang tiilan o mosakay sa laing karo sunod kaniya. Ang Romanong mga konsul ug mga mahistrado mosunod nga magbaktas, dayon ang mga tenyente ug mga tribuno sa militar uban sa mananaog nga kasundalohan​—silang tanan gidayandayanan ug mga girnaldang lawrel ug nagdalag mga gasa, ug  nanag-awit ug mga awit sa pagdayeg ngadto sa ilang pangulo. Diha sa unahan anaa ang mga saserdote ug ang ilang mga tig-alagad nga nagdala sa pangunang halad nga usa ka puting baka.

Samtang ang parada moagi sa siyudad, ang katawhan mag-itsa ug mga bulak atubangan sa karo sa mananaog, ug ang gisunog nga insenso diha sa mga halaran sa templo magpahumot sa dalan. Kining humot nga alimyon nagkahulogan ug dungog, promosyon, bahandi, ug mas tunhay nga kinabuhi alang sa mananaog nga mga sundalo, apan kini nagkahulogan ug kamatayon ngadto sa wala pasayloa nga mga binihag nga pagapatyon pagkatapos sa parada. Kini nagpatin-aw sa espirituwal nga pagpadapat ni Pablo sa ilustrasyon sa 2 Corinto 2:14-16.

Ang mga arko sa kadaogan gitukod isip pasidungog sa pipila ka heneral. Ang Arko ni Tito sa Roma nagsilbi gihapong usa ka handomanan sa pagkapukan sa Jerusalem niadtong 70 K.P. (HULAGWAY, Tomo 2, p. 536) Inubanan sa iyang amahan nga si Emperador Vespasian, si Tito nagsaulog sa iyang kadaogan batok sa Jerusalem pinaagig usa ka parada sa kadaogan. Ang ubang mga arko gigamit ingong mga ganghaan sa siyudad, apan ang kadaghanan gigamit lamang ingong mga monyumento. Ang disenyo sa mga arko lagmit naglarawan sa yugo sa pagkanasakop nga pinaagi niana ang mga binihag gipugos sa pagpalakaw.

Ang mga Kristohanon Nakigbahin sa Parada sa Kadaogan. Maoy pinasukad niana nga mga sanglitanan ug sa katibuk-ang kahibalo nianang mga panahona nga si Pablo mihimog kaamgiran sa dihang siya misulat ngadto sa mga taga-Corinto: “Salamat sa Diyos nga kanunayng nanguna kanato diha sa parada sa kadaogan kauban ni Kristo.” (2Co 2:14-16) Kini nga paglarawan naghulagway kang Pablo ug sa mga isigka-Kristohanon ingong debotadong mga sakop sa Diyos, nga “kauban ni Kristo,” ingong mga anak, hataas nga mga opisyal, ug mananaog nga mga sundalo, nga ang tanan nagsunod sa panon sa Diyos ug nga iyang gitultolan diha sa dakong parada sa kadaogan agi sa gipahumotan nga dalan.

Diha sa Colosas 2:​15, ang kahimtang lahi. Dinhi ang kaawayng mga kagamhanan ug mga awtoridad ilalom ni Satanas gihubit ingong mga binihag ug mga binilanggo diha sa parada sa kadaogan. Kini sila gihuboan ug gipasundayag o giparada ni Jehova nga Mananaog diha sa publiko ingong mga napildi​—ang mga nadaog “pinaagi niini,” nga mao, pinaagi sa “estaka sa pagsakit” nga gihisgotan sa nahaunang bersikulo. Ang kamatayon ni Kristo diha sa estaka sa pagsakit wala lamang magtagana ug pasukaranan sa pagkuha sa “sinulat-sa-kamot nga dokumento,” ang pakigsaad sa Balaod, apan nagpaposible usab nga ang mga Kristohanon mapahigawas gikan sa pagkaulipon sa satanasnong mga gahom sa kangitngit.

Ubang mga Parada. Ang Bibliya naghisgot usab sa ubang mga parada, mga okasyon diin ang panon duyog nga nagmartsa sa pagsaulog sa talagsaong mga hitabo. Gihubit ni David ang parada sa kadaogan ni Jehova gikan sa Sinai paingon sa dapit sa balaang templo sa Jerusalem​—ang mga karong iggugubat sa Diyos, mga binihag, mga mag-aawit ug mga maghohoni, ug ang nagkatigom nga mga panon sa katawhan nga nagdayeg sa Balaang Usa sa Israel. (Sal 68:​17, 18, 24-26) Ang usa ka parada maoy lakip sa pagsaulog sa inagurasyon sa panahon sa pagkatapos sa pagtukod pag-usab sa mga paril sa Jerusalem sa mga adlaw ni Nehemias. (Neh 12:31) Ug ang usa ka “parada sa pista” gihisgotan diha sa Salmo 118:​27, dayag nga may kalabotan sa tinuig nga Pista sa mga Balongbalong.