Ang mas dakong bahin sa halapad nga rehiyon sa kamingawan nga diha niana naglatagaw ang nasod sa Israel sulod sa mga 38 ka tuig una pa mosulod sa Yutang Saad. (Num 10:​11, 12; Deu 2:14) Kay walay pihong mga utlanan, ang Paran miokupar sa sentro ug sa amihanan-sidlakang bahin sa Peninsula sa Sinai. Sa S mao ang bahin sa Rift Valley nga nailhan ingong ang Araba ug usab ang Gulpo sa ʽAqaba, sa H mao ang Kamingawan sa Sinai, sa HK mao ang Kamingawan sa Sin, ug sa AK ug sa A mao ang mga Kamingawan sa Etam ug Sur. Paingon sa Patayng Dagat dapit sa AS, ang Paran nahiusa, ug tingali lakip, sa Kamingawan sa Zin ug lagmit nakaabot pa hangtod sa Beer-seba duol sa kabukiran sa Juda.​—1Sa 25:​1, 2.

Sa dakong bahin ang Paran maoy usa ka gansangon nga bukirong rehiyon sa anapog, nga ang pipila ka dapit niini patag ang ibabaw, ug ang sentro nga bahin niini maoy tali sa 600 ug 750 m (2,000 ngadto sa 2,500 p) ang gihabogon. (Deu 33:2; itandi ang Hab 3:3.) Gilakip usab kini ingong bahin sa “dako ug makalilisang nga kamingawan” nga gihisgotan sa Deuteronomio 1:​1, 19; 8:15. Walay nanubong lunhaw nga mga tanom niining grabahon nga gansangong yuta gawas kon adunay mugbong panahon sa ting-ulan; pipila lang ang mga tubod ug lagyog distansiya. Kining mga butanga nagpasiugda kon unsa ka bug-os nga ang nasod sa Israel, nga tingali mikabat ug 3,000,000 ka tawo, nagdepende kang Jehova alang sa iyang milagrosong tagana sa pagkaon ug tubig sulod sa daghang katuigan nga sila naglatagaw sa kamingawan.​—Ex 16:​1, 4, 12-15, 35; Deu 2:7; 8:​15, 16.

Lagmit ang unang paghisgot niini nga Kamingawan sa Paran maoy sa mga adlaw ni Lot sa dihang si Kedorlaomer ug ang iyang mga kaalyado nagpildi sa daghang siyudad sa mga dapit duol sa Patayng Dagat ug sa Edom hangtod sa H sa El-paran. (Gen 14:4-6) Sa ulahi, human papahawaa si Ismael sa iyang amahan nga si Abraham, siya mipuyo sa Kamingawan sa Paran ug ang iyang pangunang trabaho mao ang pagpangayam.​—Gen 21:​20, 21.

Apan, ang pangunang mga paghisgot sa Paran maoy maylabot sa mga paglatagaw sa mga Israelinhon. Human mobiya sa Bukid sa Sinai, ang Israel nagkampo sa Tabera ug Kibrot-hataava, dayon sa Hazerot sa habagatang daplin sa Paran, sa wala pa mopadulong sa A paingon sa Kades-barnea. (Num 10:​12, 33; 11:​3, 34, 35; 12:16) Wala madugay human makasulod sa Paran, ang 12 ka espiya gipadala aron sa pagsusi sa Canaan. (Num 13:​3, 26) Tungod sa daotang taho nga gihatag sa kadaghanan sa ilang pagbalik, gimando ni Jehova nga lugwayan pa ang pagpuyo sa nasod diha sa kamingawan hangtod nga mangamatay ang tanang narehistro nga nagbagulbol batok sa Diyos. (Num 13:31-33; 14:20-34) Sulod sa 40 ka tuig, ang kadaghanan sa mga gikampohan sa Israel, gikan sa  Ehipto ngadto sa Yutang Saad, maoy diha sa Paran.​—Num 33:1-49.

Sumala sa Gregong Septuagint, si David miadto sa Kamingawan sa Maon human mamatay ug ilubong si Samuel. Bisan pa niana, ang Masoretikong teksto, Syriac nga Peshitta, ug Latin nga Vulgate nag-ingon nga siya miadto sa Kamingawan sa Paran. (1Sa 25:1) Sa dihang si David nahimong hari ug nakiggubat sa Edom, ang batan-on nga Edomhanong prinsipe nga si Hadad, kauban sa pipila ka alagad sa iyang amahan, miikyas ngadto sa Ehipto. Sa ilang pagpaingon didto sila giduyogan sa pipila ka tawo didto sa Paran samtang sila miagi latas sa maong yuta.​—1Ha 11:15-18.