Usa sa duha ka “suba sa Damasco” nga giisip ni Naaman nga mas maayo kay sa “tanang tubig sa Israel.” (2Ha 5:12) Ang paghisgot ni Naaman sa Parpar ingong ikaduha lagmit nagpakita nga kini mas gamay nga suba. Kini nga suba kasagarang gilangkit sa Nahr el-ʼAʽwaj. Gawas sa Nahr Barada (nga gituohang mao ang Abana), kini lamang ang sapa sa dapit sa Damasco nga wala motapo sa laing mga suba. Apan ang gidaghanon sa tubig sa ʼAʽwaj maoy un-kuwarto ra sa gidaghanon sa tubig sa Barada. Ang gagmayng mga sapa nga natingob aron mahimong ʼAʽwaj naggikan sa sidlakang mga bakilid sa Bukid sa Hermon ug magtapo mga 30 km (19 mi) sa HK sa Damasco. Gikan niining dapita ang suba moikis-ikis latas sa lawom nga batoon nga agianan hangtod nga kini moagos sa kalamakan sa HS sa Damasco. Ang deretso nga gitas-on niini nga suba (lakip ang mga tinubdan niini) maoy mga 64 km (40 mi).

Ang dakong pagsupak nga gipatungha sa nahisgotang identipikasyon mao nga ang ʼAʽwaj dili gayod usa ka “suba sa Damasco,” sanglit kini miagos nga mga 15 km (9.5 mi) ug kapin pa dapit sa H sa maong siyudad. Tungod niini mas gituohan sa pipila nga ang Parpar mao ang Nahr Taura, usa ka sanga sa Nahr Barada. Bisan pa niana, ang paghisgot ni Naaman sa Damasco mahimong naglakip sa Patag sa Damasco nga niana nagaagos ang suba sa Nahr el-ʼAʽwaj.