Ang paghatag ug pasaylo sa nakasala; dili na mobati ug kayugot kaniya tungod sa iyang sala ug dili na magtinguha pa nga mobalos. Ang Hebreohanong berbo nga sa·lachʹ (pagpasaylo) gigamit lamang maylabot sa pagpasaylo sa Diyos sa usa ka makasasala, ang buhat nga niana ang makasasala gipasig-uli sa pag-uyon sa Diyos ingong tubag sa iyang tim-os nga pag-ampo alang sa kapasayloan o tungod sa pag-ampo sa uban.​—Num 14:​19, 20; 1Ha 8:30.

Ang laing Hebreohanong pulong nga na·saʼʹ usahay gihubad nga “pasaylo” ug mahimong magpasabot sa pasaylo o kapasayloan nga gihatag sa Diyos o sa mga tawo (Gen 18:​24, 26; 50:17). Kini gigamit usab diha sa Kasulatan sa diwa nga “iisa,” “isakay” (Gen 45:19; Ex 6:8; 2Ha 2:16), “kuha” (Gen 27:3; Num 16:15). Apan ang pangunang kahulogan sa pulong maoy “pagdala, pagpas-an.” (Gen 47:30; 1Ha 2:26; Eze 44:​12, 13) Aduna pay paghisgot niini diha sa mga teksto diin ang na·saʼʹ tukmang gihubad nga “pasaylo.” Ang Kasulatan naghisgot sa kanding alang kang Azazel ingong nagdala sa sala, ug gitagna nga ang Mesiyas magpas-an sa kasaypanan sa katawhan. (Lev 16:​8, 10, 22; Isa 53:12) Tungod sa iyang pagpas-an, o pagdala, sa kasaypanan sa uban, ang pagpasaylo mahimong posible alang kanila.​—Tan-awa ang AZAZEL.

Sa dihang ang Hebreohanong pulong nga na·saʼʹ adunay ideya sa pagpasaylo, o kapasayloan, ang Gregong Septuagint usahay mogamit sa pulong nga a·phiʹe·mi. Sa pangunang diwa niini, ang a·phiʹe·mi nagpasabot sa “pagpalakaw.” Kini nga termino mahimong magkahulogan nga “pasaylo.” Sa Roma 4:​7, si apostol Pablo mikutlo gikan sa Salmo 32:1 (31:​1, LXX), diin ang gihisgotan maoy bahin sa pagpasaylo ni Jehova sa “kalapasan,” ug siya migamit ug porma sa pulong nga a·phiʹe·mi, sama sa gigamit sa Gregong Septuagint alang sa Hebreohanong pulong nga na·saʼʹ. Ang termino makita sa ubang mga teksto diha sa Kristohanon Gregong Kasulatan ug gipadapat sa pagpasaylo sa Diyos o sa tawo sa mga sala, lakip ang pagkanselar sa mga utang.​—Mat 6:​12, 14, 15; 18:​32, 35.

Sumala sa balaod sa Diyos nga gihatag ngadto sa nasod sa Israel, aron ang tawong nakasala batok sa Diyos o batok sa iyang isigkatawo makabatog kapasayloan sa iyang mga sala, kinahanglang tul-iron una niya ang iyang kasaypanan sumala sa gilatid sa Balaod ug dayon, sa kadaghanang mga kahimtang, magtanyag ug halad nga dugo ngadto kang Jehova. (Lev 5:5–​6:7) Busa, ingon sa prinsipyo nga gipahayag ni Pablo: “Oo, halos ang tanang butang mahinloan pinaagi sa dugo sumala sa Balaod, ug gawas kon igaula ang dugo walay mahitabo nga pagpasaylo.” (Heb 9:22) Apan sa pagkatinuod ang dugo sa gihalad nga mga hayop dili makakuha sa mga sala ug makahatag sa indibiduwal ug usa ka bug-os mahinlong tanlag. (Heb 10:1-4; 9:​9, 13, 14) Sa kasukwahi, ang gitagnang bag-ong pakigsaad magpaposible sa tinuod nga kapasayloan, pinasukad sa halad lukat ni Jesu-Kristo. (Jer 31:​33, 34; Mat 26:28; 1Co 11:25; Efe 1:7) Bisan sa dinhi pa sa yuta, si Jesus, pinaagi sa pag-ayo sa usa ka paralitiko, nagpasundayag nga siya adunay awtoridad sa pagpasaylo sa mga sala.​—Mat 9:2-7.

Si Jehova maoy usa ka Diyos nga sa talagsaong paagi naghatag ug pasaylo niadtong nagtinguhag kapasayloan ug nagapasaylo “sa madagayaon gayod,” ingon sa gipakita sa mga sambingay ni Jesus bahin sa anak nga mausikon ug sa hari nga nagpasaylo sa usa ka ulipon nga nakautang ug 10,000 ka talanton (60,000,000 ka denario, o mga $40,000,000), apan ang maong ulipon dili buot mopasaylo sa isigkaulipon nga nakautang lamang ug usa ka gatos ka denario (mga $70). (Isa 55:7; Luc 15:11-32; Mat 18:23-35) Bisan pa niana, ang pagpasaylo ni Jehova dili tinukmod sa emosyon lamang, kay dili niya pasagdan ang grabeng mga kalapasan nga dili masilotan. (Sal 99:8) Dugang pa, siya dili magpugong sa pagsilot sa mga tawong tinuyong mosupak kaniya ug sa iyang matarong nga mga dalan. (Ex 34:​6, 7) Gipasidan-an ni Josue ang Israel nga si Jehova dili magapasaylo sa ilang pag-apostata.​—Jos 24:​19, 20; itandi ang Isa 2:6-9.

Ang Diyos adunay gilatid nga pamaagi aron makapangayo ug makadawat sa iyang pagpasaylo. Kinahanglang ilhon sa usa ka tawo ang iyang sala, dawaton nga kini maoy usa ka sala batok sa Diyos, isugid kini sa bug-os, magbaton ug halalom nga kinasingkasing nga kasubo tungod sa sayop nga nahimo, ug determinado nga molikay gikan sa maong dalan o buhat. (Sal 32:5; 51:4; 1Ju 1:​8, 9; 2Co 7:8-11) Kinahanglan niyang himoon ang kutob sa iyang maarangan aron tul-iron ang sayop o ang kadaot nga nahimo. (Mat 5:​23, 24) Dayon kinahanglan siyang mag-ampo sa Diyos, nga mangayo  sa iyang pagpasaylo pinasukad sa halad lukat ni Kristo.​—Efe 1:7; tan-awa ang PAGHINULSOL.

Dugang pa, ang pagpasaylo sa uban tungod sa personal nga mga sala, walay sapayan kon kapila buhata, maoy usa ka Kristohanong kinahanglanon. (Luc 17:​3, 4; Efe 4:32; Col 3:13) Ang Diyos dili mopasaylo niadtong modumili sa pagpasaylo sa uban. (Mat 6:​14, 15) Apan, bisan pa sa seryosong kalapasan nga motultol sa pagpalagpot sa “tawong daotan” gikan sa Kristohanong kongregasyon, kana nga tawo sa takdang panahon mapasaylo ra kon iyang pamatud-an nga siya matinud-anong naghinulsol. Nianang panahona ang tanan diha sa kongregasyon makapamatuod sa ilang gugma alang kaniya. (1Co 5:13; 2Co 2:6-11) Hinunoa, ang mga Kristohanon wala sugoa nga pasayloon kadtong nagabatasan sa makadaot ug tinuyong mga sala nga walay paghinulsol. Ang maong mga tawo nahimong mga kaaway sa Diyos.​—Heb 10:26-31; Sal 139:​21, 22.

Husto nga moampo sa Diyos nga pasayloon ang uban, bisan ang tibuok nga kongregasyon. Gihimo kini ni Moises maylabot sa nasod sa Israel, nga nagsugid sa sala sa nasod ug nangayog kapasayloan, ug siya gidungog nga may pag-uyon ni Jehova. (Num 14:​19, 20) Dugang pa, si Solomon, panahon sa pagpahinungod sa templo, nag-ampo nga si Jehova magapasaylo unta sa iyang katawhan sa dihang sila makasala ug dayon mobiya sa ilang sayop nga dalan. (1Ha 8:​30, 33-40, 46-52) Si Esdras naghawas sa publikong pagsugid sa mga sala sa nahibalik nga mga Hudiyo. Tungod sa iyang kinasingkasing nga pag-ampo ug pag-awhag ang katawhan milihok aron makadawat sa pagpasaylo ni Jehova. (Esd 9:13–​10:​4, 10-19, 44) Si Santiago nagdasig sa usa nga masakiton sa espirituwal nga ipatawag ang mga ansiyano sa kongregasyon aron sa pag-ampo alang kaniya, ug “kon siya nakasala, siya pagapasayloon.” (San 5:14-16) Hinunoa, adunay “sala nga makamatay,” ang sala batok sa balaang espiritu, usa ka tinuyong pagpakasala nga wala nay pagpasaylo. Dili gayod iampo sa usa ka Kristohanon kadtong nagapakasala niini nga paagi.​—1Ju 5:16; Mat 12:31; Heb 10:​26, 27; tan-awa ang SALA; ESPIRITU.