Kini mao ang napulog-duha ka tinapay nga gibutang sa ibabaw sa usa ka lamesa diha sa Balaan nga lawak sa tabernakulo o sa templo ug pulihan ug bag-ong mga tinapay matag Igpapahulay. (Ex 35:13; 39:36; 1Ha 7:48; 2Cr 13:11; Neh 10:​32, 33) Ang literal nga Hebreohanong ngalan sa pasundayag nga tinapay maoy “tinapay sa nawong.” Ang pulong nga gigamit alang sa “nawong” usahay nagkahulogang “presensiya” (1Sa 26:20), ug busa ang pasundayag nga tinapay anaa sa atubangan sa nawong ni Jehova ingong usa ka halad alang kaniya sa kanunay. (Ex 25:​30, ftn sa Rbi8) Ang pasundayag nga tinapay gitawag usab ingong “tinapay nga linut-od” (2Cr 2:4), “mga tanyag nga tinapay” (Mar 2:26), ug ingong “mga tinapay” (Heb 9:2) lamang.

Ang mga Kohatnon maoy responsable sa pagluto sa pasundayag nga tinapay “matag igpapahulay,” maingon man usab sa pagdala niini sa dihang ibalhin ang tabernakulo. (Num 4:7; 1Cr 9:32) Ang matag usa sa 12 ka siningsing nga mga tinapay hinimo gikan sa duha ka omer (0.2 ephah; katumbas  sa 4.4 L) sa pino nga harina, ug sumala ni Josephus, wala sagoli ug lebadura. (Jewish Antiquities, III, 142 [vi, 6]) Sa Igpapahulay ang daan nga mga tinapay kuhaon gikan sa lamesa sa pasundayag nga tinapay nga nahimutang sa A nga kiliran sa Balaan nga lawak (Ex 26:35) ug pulihan ug 12 ka bag-ong mga tinapay. Ang mga tinapay gilut-od sa duha ka lut-od nga tag-unom ka tinapay ang matag lut-od. Ang lunsay nga kamangyan gibutang sa matag lut-od. Ang Hudiyohanong tradisyon nag-ingon nga ang kamangyan gisulod sa bulawan nga mga sudlanan ug dili diha mismo sa mga tinapay. Kini nag-ingon nga sa dihang ang pasundayag nga tinapay kuhaon panahon sa Igpapahulay, ang kamangyan sunogon ibabaw sa halaran.​—Lev 24:5-8.

Ang daan nga mga tinapay maoy balaan kaayo, kay diha kini sa Balaan nga lawak atubangan ni Jehova sulod sa usa ka semana, ug pagakan-on sa Aaronikong mga saserdote diha sa usa ka balaang dapit, dayag nga diha sa usa ka dapit sa sulod sa sangtuwaryo. (Lev 24:9) Dihay usa lamang ka panghitabo nga natala sa kasaysayan sa Bibliya nga gikaon sa dili-Aaronikanhong mga tawo ang daan nga mga tinapay. Sa dihang mikalagiw si David gikan kang Saul, siya nangayog tinapay alang sa iyang kaugalingon ug sa iyang mga tawo gikan kang Ahimelek nga hataas nga saserdote. Sanglit si Ahimelek walay “ordinaryong tinapay,” iyang gihatagan si David ug pasundayag nga mga tinapay nga napulihan nag bag-o. Apan ang hataas nga saserdote, kay nagtuo nga si David anaa sa usa ka misyon gikan sa hari, nagbuhat lamang niini human matino nga si David ug ang iyang mga tawo maoy hinlo sa seremonyal nga paagi. (1Sa 21:1-6) Gihisgotan ni Jesu-Kristo kini nga panghitabo sa dihang mitutol ang mga Pariseo sa pagpangutlo sa iyang mga tinun-an ug mga lugas sa uhay panahon sa Igpapahulay.​—Mat 12:3-7; Luc 6:1-4.