1. Amahan ni Gedalias nga usa sa mga prinsipe sa Juda nga responsable sa paghulog kang Jeremias sa atabay.​—Jer 38:​1, 4, 6.

2. Usa ka prinsipe sa mga delegado nga gipadala ni Haring Zedekias aron sa pagpakisayod kang Jeremias bahin sa umalabot sa Jerusalem. (Jer 21:​1, 2) Gihangyo usab ni Pasur ang hari nga ipapatay si Jeremias. (Jer 38:​1, 4, 6) Si Pasur gitawag niining duha ka teksto ingong “anak nga lalaki ni Malkias.” Ang banay sa mga saserdote nga mipauli gikan sa pagkadestiyero sa Babilonya dunay susamang dugtong sa ilang talaan sa kagikan, ‘si Pasur nga anak nga lalaki ni Malkias.’ (1Cr 9:12; Neh 11:12) Kon ang prinsipe nga si Pasur usa gayod ka saserdote, tingali kaniya nga gipasukad sa “mga anak nga lalaki ni Pasur” (Num. 4) ang ilang ngalan.

3. Usa ka saserdote “nga anak nga lalaki [o kaliwat] ni Imer, . . . ang pangunang komisyonado diha sa balay ni Jehova.” Si Pasur nga misupak sa mga panagna ni Jeremias nagdapat kaniya ug nagbutang kaniya sa sepohan ug nagbuhi kaniya sa pagkasunod adlaw. Tungod niini si Jehova, pinaagi kang Jeremias, nagtagna sa pagkadestiyero ug pagkamatay ni Pasur didto sa Babilonya ug, busa, nag-ilis sa iyang ngalan gikan sa Pasur ngadto sa “Kalisang sa tibuok palibot” (Heb., Ma·ghohrʹ mis·sa·vivʹ) (Jer 20:1-6), mga pulong nga makita sa makadaghan diha sa basahon ni Jeremias.​—Jer 6:25; 20:​3, 10; 46:5; 49:29.

4. “Ang mga anak ni Pasur” maoy usa ka balay o banay sa amahan sa mga saserdote, diin 1,247 kanila ang mipauli gikan sa pagkadestiyero kauban sa saserdote nga si Jesua niadtong 537 W.K.P. (Esd 2:​1, 2, 36, 38; Neh 7:41) Unom kanila ang nagminyo ug langyawng mga asawa apan nagpapahawa kanila human miabot si Esdras niadtong 468 W.K.P.​—Esd 10:​22, 44; tan-awa ang Num. 2.

5. Usa ka saserdote o katigulangan sa usa kinsa, sa panahon ni Gobernador Nehemias, mipaluyo sa pakigsaad nga dili mokuhag langyawng mga asawa.​—Neh 9:38; 10:​1, 3, 8.