Taliwala sa pipila ka pagano ang mga patik nga nagkalainlain ug mga disenyo ipaso o ipatik diha sa panit sa mga ulipon ingong timaan sa pagpanag-iya. Gitagna ni Jehova nga ingong mga ulipon sa langyawng mga tigsakop ang mapahitas-ong mga babaye sa Juda makabaton ug “usa ka patik [Heb., ki] inay nga kaanyag.” (Isa 3:24) Ubos sa Balaod ang bugtong timaan nga himoon nganha sa usa ka ulipon mao ang pagtusok sa dalunggan sa ulipon nga boluntaryong mihangyo nga magpaulipon sa iyang agalon “hangtod sa panahong walay tino.”​—Deu 15:​16, 17.

Ang tinuyong pagdaot sa unod pinaagig pagsamad sa panit aron mopatunghag mga ulat o ang pagpasulod ug pangkolor ilalom sa panit gidili ubos sa Moisesnong Balaod. (Lev 19:28) Usahay ang mga magsisimba sa idolo magpapatik diha sa ilang mga lawas sa ngalan, emblema, o larawan sa ilang idolo nga diyos aron ipakita nga sila debotado sa maong diyos. Pananglitan, dihay mga panahon nga ang mga Ehiptohanon nagpatik sa mga ngalan o mga simbolo sa ilang mga bathala diha sa ilang dughan o mga bukton. Pinaagi sa pagsunod sa balaod ni Jehova sa dili pagdaot sa ilang mga lawas, ang mga Israelinhon mapalahi gikan sa ubang mga nasod. (Deu 14:​1, 2) Ang pagdili magsilsil usab diha kanila sa tukmang pagtahod sa tawhanong lawas ingong linalang sa Diyos, nga gamiton sa pagpasidungog kaniya.​—Sal 100:3; 139:13-16; Rom 12:1.

Si Pablo misulat ngadto sa mga taga-Galacia: “Ginadala ko sa akong lawas ang mga patik [Gr., stigʹma·ta] sa usa ka ulipon ni Jesus.” (Gal 6:17) Daghang pisikal nga mga pag-abuso ang gipahamtang sa unodnong lawas ni Pablo tungod sa iyang Kristohanong pag-alagad, nga ang pipila niini sa walay duhaduha nagbilin diha kaniya ug mga ulat, nga nagpamatuod sa katinuod sa iyang giingon ingong usa ka matinumanong ulipon nga iya ni Jesu-Kristo. (2Co 11:23-27) Kining mga butanga lagmit mao ang mga patik nga gipasabot. O kaha iyang gitumong ang kinabuhi nga iyang nasinatian ingong usa ka Kristohanon, nga nagpasundayag sa bunga sa espiritu, nga nagtuman sa buluhaton sa iyang Kristohanong ministeryo.​—Tan-awa ang MARKA.