[gikan sa Lat., nga nagkahulogang “Diyutay; Gamay”].

Ang prokonsul sa Cipro sa dihang miduaw si Pablo didto panahon sa iyang unang misyonaryong panaw sa mga 47 K.P. Husto si Lucas sa pagtawag kaniya nga prokonsul, sanglit ang pamunoan sa Cipro niadtong panahona maoy ilalom sa Romanhong Senado inay nga sa emperador. (Buh 13:​7, 12) Ang Cipro kanhi maoy usa ka lalawigan sa emperador, apan niadtong 22 W.K.P. gipailalom kini ni Agusto sa pagkontrolar sa Senado.​—Tan-awa ang PROKONSUL.

Sa Soli, sa A nga baybayon sa pulo sa Cipro, nakaplagan ang usa ka inskripsiyon nga naglakip sa mga pulong nga “sa pagkaprokonsul ni Paulo.” Ang ngalang Lucio Sergio Paulo nakaplagan diha sa Romanhong kalibotan ingong ngalan sa usa ka tagdumala sa Tiber ilalom ni Claudio Cesar. Apan, dili tino kon kining mga tawhana mao ba si Sergio Paulo nga gihisgotan sa Bibliya.​—The Annual of the British School at Athens, London, 1947, pp. 201-206.

Si Sergio Paulo nagpuyo sa Pafos, sa kasadpang baybayon nianang puloa. Siya maoy “usa ka tawong makinaadmanon,” ug kay matinuorong nagtinguha nga makadungog sa pulong sa Diyos, iyang gipatawag si Bernabe ug Pablo. Samtang sila nakigsulti niining tawhana, si Elimas (Bar-Jesus), usa ka Hudiyong barangan, “misupak kanila, nga nagtinguha sa pagpahilayo sa prokonsul gikan sa pagtuo.” Apan si Pablo, nga napuno sa balaang espiritu, misulti niini nga barangan kinsa misupak sa maayong balita nga siya temporaryong mabuta. Ug siya nabuta. Sa pagkakita niining gamhanang buhat sa espiritu sa Diyos, ang prokonsul nahimong usa ka magtutuo, “kay siya nahingangha sa pagtulon-an ni Jehova.”​—Buh 13:6-12.