Lagmit ngalan sa usa ka dapit nga duol sa Babilonya. Ang mga lalaki sa Pekod maoy lakip niadtong kasundalohan nga nagpahamtang sa paghukom ni Jehova sa dili-matinumanong Jerusalem. (Eze 23:​4, 22-26) Sa ulahi, ang Pekod mismo gitugyan ngadto sa kalaglagan.​—Jer 50:21.

Ang Pekod kasagarang gituohan nga mao ang Puqudu diha sa mga inskripsiyon nga Asiryanhon. Ang Nimrud Inscription ni Tiglat-pileser III nagpakita nga ang Pekod gidugang sa Imperyo sa Asirya ug nahimutang duol sa Elam. (Records of the Past: Ancient Monuments of Egypt and Western Asia, giedit ni A. Sayce, London, 1891, Tomo V, pp. 120, 121) Busa, kon husto nga kini mao ang Puqudu, mopatim-aw nga ang Pekod nahimutang sa S sa Tigris ug sa A sa dapit diin kining subaa ug ang Karkheh magtagbo.

Gituohan nga sa Jeremias 50:21 ang ngalang “Pekod” (sama sa Merataim) lagmit maoy balaknong ngalan alang sa Babilonya. Angayng matikdan nga ang usa ka inskripsiyon gikan sa panahon ni Nabucodonosor nagpakita nga ang Puqudu nailalom sa paggahom sa Babilonya. Busa, sa dihang napukan ang Babilonya ngadto sa mga Medianhon ug mga Persianhon, kini usab nakaapekto gayod sa Pekod.