[Heb., qa·ʼathʹ].

Ang mga maghuhubad sa Gregong Septuagint ug sa Latin nga Vulgate nagtuo nga ang Hebreohanong pulong nga qa·ʼathʹ mao ang “pelikano.” Lakip kini sa mga langgam nga gitala ingong ‘mahugaw’ diha sa Moisesnong Balaod.​—Lev 11:​13, 18; Deu 14:​11, 12, 17.

Ang pelikano maoy usa sa kinadak-an sa makalupad nga mga langgam, nga ang gitas-on sa lawas moabot ug kapin sa 1.5 m (5 p), ug ang madanihong bukhad sa mga pako maoy 2.5 m (8 p) o kapin pa. Ang dalagon nga sungo maoy taas ug samag kaw-it, ug ang dakong maunat-unat nga balonan sa ubos sa sungo niini dili daling mamatikdan kon walay sulod. Ang mga pelikano bakikaw molihok sa mamala, apan kusog ug madanihon nga molupad ug maoy tigsalag diha sa mga dapit bisan sa gilay-ong 100 km (60 mi) gikan sa mga dapit diin sila manikop ug isda. Hawod sila sa pagpangisda, ug ang ilang samag-itik nga mga tiil nagpasayon sa ilang paglangoylangoy diha sa tubig.

Sa dihang busog ang pelikano, sagad nga kini molupad ngadto sa usa ka hilit nga dapit, diin kini mobatog nga masulub-on ang dagway, nga ang ulo isuksok taliwala sa mga abaga niini, wala gayoy lihoklihok nga kon tan-awon sa layo kini maalaan nga usa ka puting bato. Buhaton kini sa pelikano sulod sa pipila ka oras, mao nga haom ang masulub-ong kahimtang nga gihisgotan sa salmista sa dihang iyang gilarawan ang kahapdos sa iyang kaguol pinaagi sa pagsulat: “Ako maoy sama sa pelikano sa kamingawan.” (Sal 102:6) Dinhi ang “kamingawan” mahimong wala magpasabot sa usa ka desyerto, apan sa usa lamang ka dapit nga halayo sa pinuy-anan sa mga tawo, tingali sa usa ka kalamakan. Sulod sa pipila ka yugto sa panahon, ang kalamakan sa amihanang Walog sa Jordan gipuy-an gihapon sa mga pelikano. Tulo ka matang sa mga pelikano ang makaplagan sa Israel. Ang labing komon mao ang puting pelikano sa sidlakan (Pelecanus onocrotalus); ang Dalmatian nga pelikano (Pelecanus crispus) ug ang rosason ug likod nga pelikano (Pelecanus rufescens) panagsa rang makita.

Gusto kaayo sa pelikano ang wala matikad nga mga dapit, diin kini dili madisturbo sa mga tawo. Dinhi kini magsalag ug mamiso ug mopahulay human manikop ug isda. Tungod kay gusto niini ang mingaw, biniyaang mga dapit, kini nga langgam gigamit sa Bibliya ingong simbolo sa bug-os nga kalaglagan. Aron ihulagway ang umaabot nga kalaglagan sa Edom, gitagna ni Isaias nga panag-iyahon sa mga pelikano ang maong yuta. (Isa 34:11) Gitagna ni Sofonias nga ang mga pelikano mopuyo diha sa mga ulo-ulo sa haligi sa Nineve, nga nagpaila sa bug-os nga kagun-oban ug pagkawalay tawo nga nagpuyo.​—Sof 2:​13, 14.