[Heb., qish·shu·ʼahʹ].

Lakip sa mga pagkaon sa Ehipto nga gipangandoy pag-ayo sa reklamador nga mga Israelinhon ug sa nagkasagol nga panon sa katawhan mao ang mga pepino, sandiya, puerro, sibuyas, ug ahos. (Num 11:5) Ang pipila ka eskolar, nga nag-isip sa pepino ingong ordinaryo ra kaayong pagkaon aron pangandoyon, nagsugyot sa melon (Cucumis melo) ingong mao ang gipasabot. Apan ang pamatuod gikan sa mga pinulongan nga amgid sa Hebreohanon, ingon man gikan sa sayong mga hubad, nagtumong sa pepino.

Ang pepino motubo ingong taas, mokatay nga bagon nga may dalag o pution nga mga bulak. Ang bunga sa komon nga pepino (Cucumis sativus) adunay hamis, berde ngadto sa asul-berde nga panit, ug ang unod maoy berdehon-puti ug daghag liso. Ang natubigan pag-ayong mga tampi sa Nilo ug ang dagaya sa yamog nga yuta sa Palestina, inubanan sa kainit sa adlaw, maayo kaayo alang sa pagtubo niini nga tanom nga malukpanong gitanom niining mga nasora.

Naandan ang pagtukod ug balongbalong o payag diha sa mga tanaman sa utanon o sa mga parasan ingong silonganan sa mga magbalantay nga nagbantay sa mga produkto sa kaumahan batok sa mga kawatan ug sa manunukob nga mga hayop. Kon sama sa gigamit sa dili pa dugayng mga panahon, ang payag maoy usa ka huyang nga tinukod nga may upat ka haligi nga gitarok sa yuta, nga may mga balabag nga nagsumpay sa mga haligi sa usag usa. Ang mga sanga gigamit sa paghimo sa atop ug sa mga bungbong, usahay kini kuroskuroson (buot ingnon, ang gagmayng mga sanga gilala), samtang ang pangunang mga dugtong sa payag ihigot sa usag usa pinaagig gagmay ug lubay nga mga sanga nga gigamit ingong pisi. Inigkatapos sa panahon sa pagpananom, kini nga mga payag biyaan, ug sa dihang ang hangin ug ulan sa tinghunlak magsugod na, kini magabok ug mahugno. Sa ingon, taliwala sa kalaglagan, ang Zion tin-awng gihulagway ingong “nahibilin sama sa usa ka balongbalong sa parasan, sama sa usa ka lantawanang payag sa uma sa mga pepino.”​—Isa 1:8.

Ang mga haligi, mga tukon, o uban pang mga galamiton gibutang usab diha sa gitikad nga kaumahan aron hadlokon ang mga hayop, ug sama sa amang ug walay kinabuhing “tawotawo sa uma sa pepino” gipakasama ni manalagnang Jeremias ang mga imahen nga gihimo sa idolatroso nga mga nasod.​—Jer 10:5.