Usa ka hamis, gahion, linginon, ug sagad puti nga mutya nga may maanindot nga gilaw nga samag balangaw ang kolor, nga sukad pa sa karaang mga panahon gigamit ingong dayandayan. (1Ti 2:9; Pin 17:4; 18:​11, 12, 15, 16; 21:​2, 21) Usa kini ka migahing masa sa calcium carbonate nga maporma sulod sa mga tipay ug sa ubang mga mollusk. Kon may usa ka partikulo (sama sa usa ka lugas sa balas o usa ka gamayng parasito) nga nakasulod sa bayanan sa usa ka mollusk, kini magpagawas ug substansiya nga may calcium carbonate nga gitawag ug nacre, nga mogahi ug mahimong lut-od sa perlas nga molimin sa partikulo nga nakasulod niini. Ang sunodsunod nga mga lut-od nga samag substansiya sa bayanan padayong molimin sa partikulo nga maoy nagsilbing uyok. Kon ang uyok dili motapot sa bayanan tungod sa paglihok sa mga hanig sulod sa bayanan, maporma ang usa ka matahom nga perlas sa paglabay sa ubay-ubayng katuigan.

Ang primera klaseng mga perlas makuha gikan sa mga tipay nga makaplagan sa kadaghanang tropikanhong katubigan, ug ilabina sa palibot sa Bahrain diha sa Gulpo sa Persia, ug sa Pulang Dagat.

Masambingayong Paggamit. Ang Bibliya usahay masambingayong naghisgot sa kabililhon sa mga perlas. Maylabot sa pagkalabaw ug bili sa matuod nga kaalam, si Job miingon: “Ang usa ka puntil nga kaalam bililhon pa kay sa usa nga puno sa mga perlas.” (Job 28:18) Sa Wali sa Bukid, si Jesu-Kristo nagtambag: “Ayaw ihatag sa mga iro ang butang balaan, ni iitsa atubangan sa mga baboy ang inyong mga perlas, aron dili gayod nila kini yatakyatakan ilalom sa ilang mga tiil ug mosumbalik ug mowataswatas kaninyo.” (Mat 7:6) Dayag nga gipasabot ni Jesus nga, kon ang usa ka tawo sama sa usa ka iro o baboy, nga walay pagpabili sa espirituwal nga mga butang, ang usa dili na kinahanglang maningkamot pa sa pagpaambit kaniya sa espirituwal nga mga panghunahuna ug pagtulon-an. Tamaktamakan lamang sa maong daotan nga mga tawo ang bililhong espirituwal nga mga butang ug abusohan ug pasakitan ang usa nga naningkamot sa pagpaambit niini ngadto kanila. Giilustrar usab ni Jesus ang kabililhon sa Gingharian sa mga langit pinaagi sa paghisgot sa “usa ka perlas” nga bililhon kaayo nga tungod niana ang nagapanaw nga magpapatigayon nga nangitag maayong mga perlas “nagbaligya dayon sa tanang butang nga iyang nabatonan ug nagpalit niini.” (Mat 13:​45, 46) Busa gipakita ni Jesus nga ang usa ka tawo nga miapresyar sa tinuod nga bili sa pagsulod sa Gingharian sa mga langit kinahanglang andam sa pagbiya sa tanang butang aron makab-ot kini.​—Itandi ang Mat 11:12; Luc 13:23-25; Flp 3:8-11.