Usa ka butang nga nabatonan ilis sa usa ka bililhong butang nga gihatag​—salapi, manggad, serbisyo, o bisan kinabuhi.

Sukad pa sa adlaw ni Abraham ang mga tawo sa naandang paagi nagabaligya ug nagapalit ug mga manggad, propiedad, o mga serbisyo, nga migamit ug usa ka butang nga ibaylo sama sa salapi, maingon gayod sa gibuhat karong adlawa. Ang mga lalaking ulipon ni Abraham maoy “pinalit sa salapi.” (Gen 17:​12, 13) Sa dihang namatay si Sara pormal nga gipalit ni Abraham ang usa ka luna sa yuta ingong lubnganan sa iyang banay gikan kang Epron, usa sa mga anak nga lalaki ni Het. (Gen 23:3-20; 49:29-32) Ang mga detalye niining unang gitala nga legal nga kontrata diha sa Kasulatan maoy makaiikag.

Agig tiunay nga pagpakitag maayong kabubut-on, si Abraham miyukbo sa dihang mipahayag sa iyang tanyag. Dili ang yuta, kondili ang langob lamang ‘nga anaa sa tumoy sa yuta ni Epron’ ang buot nga paliton ni Abraham. Agig tubag, gitanyag ni Epron nga ihatag na lamang kini. Dili matino kon siya nagpakaaron-ingnon ba lamang sa pagkamahinatagon sa mga taga-Sidlakan pinaagi sa pag-ingon nga iyang ihatag ang propiedad ngadto kang Abraham (Gen 23:7-11), o sama sa gituohan sa uban, siya nagpahayag lamang ug pagkaandam sa pagtugyan niini, nga mao, ‘ihatag kini’ bugti sa usa ka bili. Ang tinuoray mao nga siya miinsistir nga ang langob ug ang yuta mahilakip sa kasabotan. Gihimo ang kataposang kasabotan, gibungat ang bili, gihimo ang pagpalit, ug ang salapi maampingong gitimbang nga “upat ka gatos ka siklo nga plata nga maoy ibayad sa mga magpapatigayon niadtong panahona.” (mga $880) (Gen 23:16) Niadtong panahona ang salapi dili mga sensilyo apan timbangon diha sa mga timbangan. Busa “ang yuta ug ang langob nga diha niana ug ang tanang kahoy nga diha sa yuta, nga nahisulod sa tanang utlanan niini palibot, napamatud-an ngadto kang Abraham ingong iyang pinalit nga katigayonan.” Kining tanang legal nga transaksiyon gihimo sa atubangan sa duha ka partido ug sa mga saksi, oo, “sa atubangan sa mga mata sa mga anak ni Het taliwala sa tanan niadtong nanulod sa ganghaan sa iyang siyudad.” (Gen 23:​17, 18) Sa susama, si Jacob sa ulahi mipalit ug usa ka luna sa yuta gikan sa mga Sekemnon.​—Gen 33:​18, 19.

Sulod sa pito ka tuig nga gutom, si Jose, ingong primer ministro sa Ehipto, namaligyag lugas sa sinugdan bugti sa salapi, ug sa dihang kana nahurot na, siya midawat sa ilang binuhing kahayopan, dayon sa ilang yuta, ug sa kataposan sa mga tawo mismo ingong bayad.​—Gen 42:2-25; 47:13-23.

Ang Balaod ni Moises hugot nga nagdili sa pagpalit ug pagbaligya sa panahon sa Igpapahulay, maingon nga kini nagdili usab sa dili-minatarong nga mga pakiglabot sa negosyo. Sa panahon nga nahimong apostata ang Israel kini nga mga balaod subsob nga gilapas.​—Lev 25:14-17; Neh 10:31; 13:15-18; Am 8:4-6.

Sa dihang buot paliton ni Haring David ang giokanan ni Arauna (Ornan), ang maong tawo malipayong misulay sa paghatag niana ngadto sa hari.  Apan si David miinsistir sa pagbayad niini sa bug-os nga kantidad nga 50 ka siklong plata ($110) aron tukoran gilayon ug halaran dugang pa sa kinahanglanong mga materyales alang sa paghalad. Sa ulahi, mipatim-aw nga daghan sa naglibot nga propiedad ang gidugang aron ilakip sa usa ka dakong luna alang sa tibuok dapit nga tukoran sa templo, ang kantidad sa pagpalit maoy 600 ka siklo nga bulawan ang gibug-aton (mga $77,070). (2Sa 24:21-24; 1Cr 21:22-25) Sulod sa mga paghari ni Haring Jehoas ug Josias, gihimo ang pagpalit sa mga materyales ug pagsuhol sa mga nagtrabaho sa pag-ayo sa templo.​—2Ha 12:9-12; 22:3-7.

Si Jeremias mipalit ug usa ka uma sa iyang lungsod nga natawhan sa Anatot, nga naghubit sa legal nga transaksiyon niining paagiha: “Ako misulat ug usa ka sulat-kalig-onan ug gitimbrehan kini ug mikuhag mga saksi samtang ako nagtimbang sa salapi diha sa timbangan.”​—Jer 32:9-16, 25, 44.

Sa Kristohanon Gregong Kasulatan adunay daghang paghisgot usab labot sa pagpalit ug mga manggad ug mga materyales​—pagkaon, lana, besti, perlas, uma, balay, bulawan, banyos sa mata, paninda sa katibuk-an, hayop, ug bisan mga tawo. (Mat 13:44-46; 25:8-10; 27:7; Mar 6:37; Ju 4:8; 13:29; Buh 1:18; 4:34-37; 5:1-3; Pin 3:18; 13:17; 18:11-13; tan-awa ang BANGKO, MAGBABANGKO.) Pinaagig pagpalit ang magtutuong mga Hudiyo gipagawas gikan sa tunglo sa Balaod pinaagi kang Kristo, kinsa nahimong tinunglo imbes nga sila sa dihang siya, bisan tuod inosente, gibitay diha sa estaka. (Gal 3:13; 4:5) “Pinaagi sa dugo sa iyang kaugalingong Anak,” gipalit ni Jehova ang tibuok “kongregasyon sa Diyos.”​—Buh 20:28.