1. Anak nga lalaki ni Eleasar ug apo ni Aaron. Ang iyang inahan maoy anak ni Putiel, ug ang ngalan sa iyang anak nga lalaki maoy Abisua. (Ex 6:25; 1Cr 6:4) Ang dihadihang paglihok sa batan-ong si Pinehas mao ang nagpahunong sa hampak gikan kang Jehova human mangamatay ang 24,000 ka Israelinhon didto sa Kapatagan sa Moab tungod sa pagpakighilawas ug tungod kay sila nalambigit sa Baal sa Peor. Sa dihang iyang nakita si Zimri nga nagdala sa babayeng Midianhon nga si Cozbi ngadto sa iyang tolda, iyang giduslak silang duha pinaagig bangkaw, “ang babaye lapos sa kinatawo sa babaye.” Kini nga kasibot sa ‘dili pagtugot nga may makig-indig’ kang Jehova “giisip nga pagkamatarong alang kaniya,” ug gihimo sa Diyos ang usa ka pakigsaad nga ang pagkasaserdote magpabilin sa iyang kaliwatan “hangtod sa panahong walay tino.”​—Num 25:1-3, 6-15; Sal 106:​30, 31.

Sa panahon sa iyang pagkinabuhi, si Pinehas nag-alagad sa lainlaing mga katungdanan. Siya ang saserdoteng hawas sa kasundalohan nga nagpahamtang sa panimalos ni Jehova batok sa Midian. (Num 31:​3, 6) Sa dihang gihunahuna nga ang tulo ka tribo mitalikod sa pagsimba kang Jehova, siya ang nangulo sa grupo nga nagsusi niini. (Jos 22:9-33) Siya ang pangulo sa mga magbalantay-sa-ganghaan sa tabernakulo. (1Cr 9:20) Human ikalubong ang iyang amahan sa Bungtod ni Pinehas, siya nag-alagad ingong hataas nga saserdote. (Jos 24:33; Huk 20:​27, 28) Ang iyang ngalan prominente sa daghang talaan sa kagikan human sa pagkadestiyero.​—1Cr 6:​4, 50; Esd 7:5; 8:2.

2. Ang manghod tali sa duha ka “walay-silbi” nga mga anak nga lalaki ni Eli nga saserdote. (1Sa 1:3; 2:12) Samtang nag-alagad ingong mga saserdote, siya ug ang iyang igsoong si Hopni nakigdulog uban sa mga babaye sa sangtuwaryo ug ‘wala tahora ang halad alang kang Jehova.’ (1Sa 2:13-17, 22) Sa dihang gibadlong sa huyang nga paagi sa ilang amahan, sila wala mamati. Tungod sa ilang pagkadaotan gipahayag sa Diyos ang paghukom batok kanila. Kini natuman sa dihang silang duha namatay sa mao rang adlaw sa pagpakiggubat batok sa mga Filistehanon. (1Sa 2:23-25, 34; 3:13; 4:11) Ang balita mahitungod sa pagkailog sa Arka ug ang kamatayon sa iyang ugangang lalaki ug sa iyang bana wala makaya sa asawa ni Pinehas. Siya nakuratan ug namatay human manganak kang Ikabod.​—1Sa 4:17-21.

3. Usa ka Levihanon kansang anak nga lalaki nga si Eleasar mitabang sa pag-imbentaryo sa mga bahandi sa templo sa panahon ni Esdras, niadtong 468 W.K.P.​—Esd 8:​33, 34.