Usa ka habog nga dapit sa amihanang bahin sa kabukiran sa Abarim nga diha mismo sa S sa Patayng Dagat. Ang tukmang nahimutangan niini wala mahibaloi. Ang mga paghisgot niini sa Bibliya dili sumpaki sa gituohan nga kini mao ang Ras es-Siyaghah, usa ka punta nga nahimutang mga 16 km (10 mi) sa S diin moagos ang Jordan ngadto sa Patayng Dagat. Ang Ras es-Siyaghah maoy AK ug diyutay sa Jebel en-Neba, nga ang tayuktok niini naandang gitawag nga Bukid sa Nebo (Har Nevo).

Ang mga porma niining duha ka habog nga mga dapit nahiuyon sa mubong paghubit sa Bibliya. Ang Ras es-Siyaghah maoy mga 100 m (330 p) nga mas ubos kay sa Jebel en-Neba ug kining duha giulang sa usa ka medyo ubos nga tagaytay. Bisan tuod ubos ug diyutay sa silingan nga tayuktok, ang Ras es-Siyaghah mas duol sa Jerico ug kita kaayo ang Patayng Dagat nga mga 1,000 m (3,300 p) sa ubos, ingon man ang matahom nga talan-awon sa Walog sa Jordan, ang sentro nga kabukiran diin nahimutang ang Hebron, Betlehem ug Jerusalem, ug ang Bukid sa Hermon nga kapin sa 160 km (100 mi) sa A.

Unang gihisgotan kining dapita maylabot sa mga gikampohan sa Israel sa pagpaingon niini sa Yutang Saad. (Num 21:20) Nahimutang kini sa habagatang bahin sa teritoryo nga nailog gikan sa mga Amorihanon human nga ang ilang hari nga si Sihon wala magtugot sa mga Israelinhon nga moagi sa ilang yuta. (Deu 4:​46, 49; Jos 12:1-3) Sa ulahi, si Balak nga hari sa Moab nagdala kang Balaam “ngadto sa yuta sa Zopim, ngadto sa tumoy sa Pisga,” sa kawang nga paningkamot nga tunglohon ang mga Israelinhon.​—Num 23:14.

Apan, ang Pisga labawng mahinumdoman tungod kay didto bug-os nga nakita ni Moises ang Yutang Saad wala madugay una pa sa iyang kamatayon. (Deu 3:27; 34:1-3) Ang Pisga gipahat ingong bahin sa teritoryo sa tribo ni Ruben.​—Deu 3:​16, 17; Jos 13:​15, 20.

Sa bisan haing teksto nga makita ang ngalang Pisga diha sa Bibliya, kini kanunayng gihubit uban sa mga ekspresyon nga “ulohan sa,” “tumoy sa,” o “mga bakilid sa” Pisga. Tungod niini subsob kining gihisgotan ingong Bukid sa Pisga, bisan tuod wala kini hisgoti nga ingon niana diha sa Kasulatan.