Usa ka ilaya nga rehiyon sa habagatang Asia Minor. Usa kini ka bukirong seksiyon, sa may kasadpang bahin sa Kabukiran sa Taurus, nga nahimutang sa A sa Pamfilia ug sa H sa Frigia sa Galacia, diin ang Caria ug Licia anaa sa K ug ang Licaonia anaa sa S. Gituohan nga ang rehiyon maoy mga 190 km (120 mi) gikan sa S ngadto sa K ug mga 80 km (50 mi) ang gilapdon. Kini adunay daghang habog nga mga tagaytay nga gitadlasan sa mga walog ug sa mga suba sa bukid; adunay mga lasang ug mga sibsibanan.

Ang katawhan sa Pisidia maoy mabangis ug mahiligon sa gubat, nga nagpormag tribonhong mga pundok sa mga tulisan. Kining mga nagpuyo sa kabukiran lisod kontrolahon ug dili daling maimpluwensiyahan sa Helenistiko o sa Romanhong kultura. Ang mga Romano nagtahas kang Haring Amyntas sa Galacia sa pagsakop kanila, apan siya  namatay una pa niya mahimo kini. Ang Pisidia nahimong bahin sa Romanhong lalawigan sa Galacia niadtong 25 W.K.P., ug niadtong 6 W.K.P. ang mga kolonya sa maong dapit gibutangag mga garison aron mabantayan kini nga mga tawo. Kini nga mga kolonya gidumala gikan sa Antioquia, usa ka siyudad nga duol sa utlanan tali sa Pisidia ug Frigia. (Tan-awa ang ANTIOQUIA Num. 2.) Niadtong 74 K.P. ang habagatang bahin sa Pisidia gilakip sa Pamfilia ug Licia ug nahimong usa ka Romanhong lalawigan. Ang amihanang seksiyon nagpabiling bahin sa lalawigan sa Galacia hangtod nga, human sa panahon sa mga apostoles, kini gilakip sa bag-ong lalawigan nga ginganlag Pisidia.

Si apostol Pablo miagi sa Pisidia sa iyang unang misyonaryong panaw, nga mipanaw gikan sa kabaybayonan sa Pamfilia ngadto sa kabukiran paingon sa Antioquia sa Pisidia. (Buh 13:​13, 14) Siya usab miagi sa Pisidia sa iyang pagbalik. (Buh 14:​21, 24) Ang mga bandido ug ang kusog nga bul-og sa mga suba sa bukid sa maong dapit lagmit mao ang gibasehan sa pag-ingon ni Pablo nga siya ‘nameligro sa mga suba, nameligro gikan sa mga tulisan sa dalan.’​—2Co 11:26.