Ang usa nga mohulma, mosalsal, molilok, mokulit, o mohimog uban pang mga trabaho labot sa mga metal. (Isa 41:7) Ang unang “mananalsal sa tanang matang sa himan nga tumbaga ug puthaw” nga narekord sa kasaysayan mao si Tubal-cain. (Gen 4:22) Ang karaang mga platero naggamag mga himan, mga gamit sa panimalay, hinagiban, armadura, tulonggon, pahiyas, ug mga pigurin. Gawas pa sa paggamag bag-ong mga butang, sila usab mihimog pagpang-ayo. (2Cr 24:12) Daghan ang eksperto sa pagsalsal ug mga metal sama sa bulawan (Neh 3:​8, 31, 32), plata (Huk 17:4; Buh 19:24), o tumbaga (2Ti 4:14). Usahay sila nagtukod ug asosasyon o kapunongan alang sa ilang trabaho. (Neh 3:31; Buh 19:24-28) Ang ilang trabaho nagkinahanglan ug kahanas sa paghimog makuting disenyo.

Lagmit ang mga Israelinhon maantigo na sa paggamag galamitong metal sa wala pa sila mosulod sa Ehipto, o lagmit ilang nakat-onan kini didto. Sa panahon sa Pagpanggula, sila maantigo na sa pag-umol ug estatwa sa nating baka ug halas nga tumbaga. (Ex 32:4; Num 21:9) Apan, labawng dalayegon mao ang ilang paggamag lainlaing mga galamitong metal alang sa pag-alagad diha sa tabernakulo. Si Bezalel ug ang iyang mga luyoluyo giabagan sa espiritu ni Jehova sa ilang paggamag mga galamitong metal.​—Ex 31:​2, 3; 35:30-35.

Sa ulahi, sa dihang gidaogdaog sa mga Filistehanon, ang mga Israelinhon gidid-an sa pagbatog kaugalingong mga platero. Kini nga pagdili nagpugong kanila sa paggamag mga hinagiban. (1Sa 13:19-22) Sa walay duhaduha tungod sa samang mga hinungdan nga gibihag ni Nabucodonosor ang mga platero ug ang ubang mga artesano sa panahon sa iyang unang pag-atake sa Jerusalem.​—2Ha 24:​14, 16; Jer 24:1; 29:​1, 2.