Ang pangunang lokal nga administrador sa usa ka lalawigan nga ubos sa pagdumala sa Romanhong Senado.

Niadtong 27 W.K.P., gidumala ni Emperador Agusto sa Roma ang tanang lalawigan nga nagkinahanglang butangan ug kasundalohan, ug gitugyan ang napulo ka ubang lalawigan ubos sa pagdumala sa senado. Ang mga lalawigan nga ubos sa pagdumala sa senado gimandoan pinaagig mga prokonsul. Adunay duha ka matang sa mga prokonsul: Mga kanhing konsul (kadtong nahimo nang konsul), nga gipadala ngadto sa mga lalawigan sa Asia ug Aprika (diin adunay gimentinar nga puwersa nga usa ka lehiyon), ug mga kanhing praetor, nga gipadala ngadto sa ubang mga lalawigan nga gidumala sa senado.

Ang responsibilidad sa usa ka prokonsul mao ang pagdumala sa mga kalihokang sibil sa lalawigan, paghimog hudisyal nga mga desisyon, ug pagpatunhay sa balaod ug kahusay. Ang iyang hurisdiksiyon maoy kinalabwan diha sa lalawigan, bisan tuod ang iyang mga kalihokan maoy ubos sa pag-usisa sa Romanhong senado. Ang pagkolekta sa mga buhis maoy ubos sa usa ka quaestor. Ang prokonsul dili magsul-ob ug besti sa usa ka sundalo o magdala ug espada.

Ang prokonsul nga si Sergio Paulo gihisgotan sa Buhat 13:​7, 12 ingong usa ka prokonsul nga nahimong Kristohanon. Siya ang prokonsul sa Cipro. Sa Buhat 18:​12, si Galio gihisgotan ingong prokonsul sa lalawigan sa Acaya. Husto si Lucas sa iyang paggamit sa terminong “prokonsul” niining mga tekstoha, kay ang Acaya maoy usa ka lalawigan nga ubos sa pagdumala sa senado sukad sa 27 W.K.P. hangtod sa 15 K.P., ug sa makausa pa human sa 44 K.P.; ug ang Cipro nahimong usa ka lalawigan nga ubos sa pagdumala sa senado niadtong 22 W.K.P. Usa ka sensilyo gikan sa Cipro ang nakaplagan nga may ulo ug titulo ni Claudio (diha sa Latin) sa atubangan niini ug sa pikas nga bahin gipatik ang “Ubos Kang Cominius Proclus, Prokonsul sa mga Taga-Cipro” (diha sa Grego).