Usa ka lingin nga pahiyas nga isul-ob diha sa pulso o sa ubos nga bahin sa bukton, usahay walay bugto nga likong, apan sa pipila ka kahimtang may giwang o siradura. Sa karaang kapanahonan ang mga pulseras gisul-ob sa mga lalaki ug mga babaye, usahay sa usa lamang ka bukton, apan may mga higayon nga isul-ob diha sa duha ka bukton. Ang karaang mga pulseras ginama gikan sa bronse, bildo, puthaw, plata, ug bulawan ug sagad butangan ug daghang pahiyas, usahay kini adornohan ug mga mutya.

Ang mga Hebreohanon nagsul-ob ug mga pulseras, ug kini gigamit sa kadaghanan sukad pa sa unang mga panahon sa Palestina, diin ang mga arkeologo nakakaplag ug daghan niini, nga ginama gikan sa lainlaing mga materyales, ilabina sa bronse. Ang alagad ni Abraham mihatag kang Rebeca ug bulawang singsing sa ilong ug usab duha ka pulseras (Heb., tsemi·dhimʹ) nga may gibug-atong napulo ka siklo (114 g) nga bulawan. (Gen 24:​22, 30, 47) Lakip sa mga butang nga gikuha ingong inagaw sa gubat gikan sa mga Midianhon mao ang mga pulseras, nga lakip sa bililhong mga butang nga gitanyag sa mga Israelinhon ngadto sa Diyos.​—Num 31:50.

Pinaagi kang Ezequiel, gilarawan sa Diyos ang iyang kaugalingon nga nagdayandayan sa Jerusalem pinaagig mga pulseras ug uban pang mga pahiyas. Apan sanglit gigamit niya ang maong maanindot nga mga butang sa idolatrosong paagi ug namampam, si Jehova mitagna nga siya magsilot kaniya ug magkuha niining mga butanga gikan kaniya. (Eze 16:​11, 17, 38, 39) Ang mga pulseras (Heb., sheh·rohthʹ) maoy lakip sa mga butang nga giingon ni Jehova nga iyang kuhaon gikan sa mapahitas-ong “mga anak nga babaye sa Zion.”​—Isa 3:​16, 19.

Ang likong o pulseras sa ibabawng bahin sa bukton (Heb., ʼets·ʽa·dhahʹ) gisul-ob sa mga monarko ingong timailhan sa ilang harianong awtoridad o soberanong gahom. Lagmit nga mao kini ang kahulogan sa pulseras nga gisul-ob sa bukton ni Haring Saul sa Israel.​—2Sa 1:10; tan-awa ang DAYANDAYAN, PAHIYAS.