[lagmit, Baka].

Anak nga babaye ni Betuel nga anak nga lalaki ni Nahor, ug busa apo ni Abraham sa pag-umangkon. Ang ngalan sa iyang igsoong lalaki mao si Laban.​—Gen 22:20-23.

Niadtong 1878 W.K.P., sa dihang gipadala ni Abraham ang nagdumala sa iyang panimalay, nga lagmit si Eliezer, aron sa pagpangitag angayang asawa alang sa iyang anak nga si Isaac (nga niadtong panahona 40 anyos na), nahiabot siya “sa siyudad ni Nahor” sa ibabaw nga bahin sa walog sa Mesopotamia. Didto sa usa ka atabay, kini nga alagad nag-ampo nga ang pilion ni Jehova mao unya ang batan-ong babaye nga dili lamang magpainom kaniya kon hangyoon kondili moboluntaryo usab sa pagpainom sa iyang napulo ka kamelyo. (Gen 24:1-14) Samtang siya nag-ampo, miabot si Rebeca sa atabay nga may dalang banga. Sa dihang iyang gihangyo siya nga paimnon ug tubig, siya malipayong nagpainom kaniya ug dayon “dihadiha siya nagbubo sa iyang banga sa imnanang pasong ug midagan nga pabalikbalik ngadto sa atabay sa pagkalos ug tubig, ug nagpadayon sa pagkalos alang sa iyang tanang kamelyo. Sa kasamtangan ang tawo nagsud-ong kaniya sa katingala, nga naghilom aron mahibaloan kon si Jehova nagpalampos ba sa iyang panaw o wala.” Si Rebeca buotan, maabiabihon, makasaranganon sa iyang batasan, ug kugihan; gawas pa niini, “ang batan-ong babaye makabibihag kaayo sa panagway.”​—Gen 24:14-21.

Ang alagad ni Abraham, kay nakasabot nga gitubag ang iyang pag-ampo, mihatag kang Rebeca ug bulawan nga singsing sa ilong ug duha ka maanindot nga bulawang pulseras (nga mokantidad ug mga $1,350 sa bili karon). Iyang gipakita kini sa iyang pamilya​—sa iyang inahan ug sa iyang igsoong lalaki nga si Laban​—kinsa, sa baylo, nag-abiabi sa bisita ug sa mga sulugoon nga uban kaniya diha sa ilang balay. (Gen 24:22-32) Apan sa wala pa siya mokaon, gisulti sa tawo ang iyang tuyo. Si Laban ug ang iyang amahan nga si Betuel miuyon nga si Rebeca maminyo kang Isaac; ang mga gasa, nga naglakip sa mahalong mga butang nga bulawan ug plata ug maanindot nga mga besti, gihatag kang Rebeca ug sa iyang pamilya, ug dayon silang tanan nangaon. (Gen 24:33-54) Kini nga transaksiyon nagsilbing usa ka dungganong kasabotan sa kaminyoon, dili tali kang Rebeca ug Isaac, kondili tali sa ilang mga ginikanan, sumala sa kostumbre niadtong panahona. Niining paagiha si Rebeca nahimong sinayoran alang kang Isaac ug sa ingon sukad niadto nahimong iyang asawa.

Uban sa pag-uyon ni Rebeca, ang nagapanaw nga panon migikan sa pagkabuntag alang sa halayo nga panaw paingon sa Negeb duol sa Beer-lahai-roi, diin si Isaac nagpuyo niadtong panahona. Sa wala pa siya mobiya, ang pamilya ni Rebeca nagpanalangin kaniya, nga nag-ingon: “Hinaot nga ikaw mahimong libolibo ka napulo ka libo, ug ang imong binhi manag-iya sa ganghaan niadtong nagadumot niini.” Ang iyang iwa nga si Debora ug ang ubang mga babayeng tig-alagad miuban kang Rebeca, nga mopatim-awng walay usa kanila ang nakabalik sukad niadto sa ilang yutang natawhan.​—Gen 24:55-62; 35:8.

Sa pag-abot sa ilang destinasyon, si Rebeca nagtabon sa iyang ulo sa dihang miduol ang iyang pamanhonon nga si Isaac, ug human iasoy sa alagad ni Abraham ang tanang hitabo sa iyang panaw, nga nag-asoy kon sa unsang paagi gitultolan ni Jehova ang maong pagpili, gidala ni Isaac si Rebeca ngadto sa tolda sa iyang inahan aron mahimo niyang asawa. Gihigugma pag-ayo ni Isaac si Rebeca, ug diha kaniya siya “nakakaplag ug kahupayan human sa kamatayon sa iyang inahan” nga si Sara, kinsa namatay tulo ka tuig una pa niana.​—Gen 24:63-67.

Sama kang Sara, si Rebeca nagpabiling apuli sa dugayng panahon. Human sa mga 19 ka tuig, nga nianang panahona nagpadayon si Isaac sa pagpangaliyupo kang Jehova, siya nagmabdos ug dayon nanganak sa kaluha nga si Esau ug Jacob. Makapaguol kaayo ang iyang pagmabdos, sanglit ang duha nagbugnoay sulod sa iyang tagoangkan, mao nga si Rebeca miingon, “Nganong mabuhi pa ako?” Agig tubag, si Jehova nagpasalig kaniya nga siya mahimong inahan sa duha ka dagkong nasod ug nga “ang magulang mag-alagad sa manghod.” (Gen 25:20-26) Si Pablo nag-ingon nga kini maoy aron ipasundayag nga ang pagpili sa ‘gisaad nga binhi’ bug-os mag-agad sa Diyos.​—Rom 9:6-13.

Usab sama kang Sara, si Rebeca nagtago sa iyang pagkatawo sa usa ka higayon, nga nagpaila ingong igsoong babaye sa iyang bana. Nahitabo kini sa dihang ang gutom sa yuta nagpugos sa iyang pamilya sa pagpuyo sulod sa usa ka panahon sa teritoryo sa mga Filistehanon nga gimandoan ni Haring Abimelek. Lagmit edaran na si Rebeca niadtong panahona, apan tungod sa iyang hilabihang katahom, si Isaac, ang natudlong manununod sa Abrahamikong pakigsaad, nagtuo nga siya mameligro nga patyon kon mahibaloan nga siya ang bana ni Rebeca.​—Gen 26:1-11.

Sa dihang tigulang na si Isaac ug nangandam sa pagpanalangin kang Esau nga iyang panganay, si Rebeca milihok dayon aron matino nga maangkon ni Jacob ang gitinguhang panalangin. (Gen 25:28-34; 27:1-5) Walay gisulti kon nahibalo ba si Rebeca  bahin sa legal nga katungod ni Jacob sa pagkapanganay tungod sa pagpalit niini, apan siya nahibalo pag-ayo sa gisulti ni Jehova kaniya, nga mao, ang magulang mag-alagad sa manghod. Busa milihok siya aron matino nga maangkon ni Jacob ang panalangin sa iyang amahan. Ang resulta maoy uyon sa katuyoan ni Jehova.​—Gen 27:6-29; tan-awa ang JACOB Num. 1.

Sa ulahi, sa dihang nahibaloan ni Rebeca ang plano ni Esau sa pagpatay kang Jacob, iyang giaghat si Isaac sa pagpaadto kang Jacob sa iyang yutang natawhan aron sa pagpangita ug asawa. Nagpaguol gayod kaniya ug kang Isaac nga si Esau mikuhag duha ka asawa gikan sa gidumtang mga Canaanhon.​—Gen 26:​34, 35; 27:41-46; 28:​1-5; 29:10-12.

Wala isulti kon kanus-a namatay si Rebeca, apan tingali kini nahitabo sa wala pa mopauli si Jacob gikan sa Mesopotamia. (Gen 35:27) Siya gilubong sa langob sa pamilya didto sa Makpela uban kang Abraham ug Sara, diin didto usab gilubong sa ulahi si Isaac, Lea, ug Jacob.​—Gen 49:29-31; 50:13.