[Nagpadaghan (Nagpadako) sa Katawhan].

Anak nga lalaki ni Solomon pinaagi sa iyang Ammonhanong asawa nga si Naama. Siya mipuli sa iyang amahan sa trono niadtong 997 W.K.P. sa panuigon nga 41 ug naghari sulod sa 17 ka tuig. (1Ha 14:21; 1Cr 3:10; 2Cr 9:31) Si Rehoboam nailhan ingong, labing menos sa makadiyot, ang kataposang hari sa hiniusang monarkiya ug dayon ang unang magmamando sa duha-ka-tribong gingharian sa Juda ug Benjamin sa habagatan, tungod kay wala madugay human nga siya gipurongpurongan sa tibuok Israel ingong hari didto sa Sekem, nabahin ang hiniusang gingharian ni David ug Solomon. Gihunong sa napulo ka tribo ang ilang pagpaluyo kang Rehoboam ug gihimo si Jeroboam nga ilang hari, sama gayod sa gitagna ni Jehova pinaagi ni manalagnang Ahias.​—1Ha 11:29-31; 12:1; 2Cr 10:1.

Kini nga panagkabulag nahitabo human nga ang usa ka delegasyon sa katawhan, uban kang Jeroboam ingong ilang tigpamaba, mihangyo kang Rehoboam sa pagtangtang sa pipila ka malupigong pamaagi nga gipahamtang kanila ni Solomon. Nagpakitambag si Rehoboam bahin sa maong butang. Unang gikonsulta niya ang mga ansiyano, nga nagtambag kaniya nga magpatalinghog sa pagtuaw sa katawhan ug kunhoran ang ilang mga palas-anon, sa ingon maghimo kaniyang usa ka maalamong hari, usa nga higugmaon sa iyang katawhan. Apan gisalikway ni Rehoboam kining hinamtong nga tambag ug gipangayo ang tambag sa batan-ong mga lalaki nga iyang katalirongan. Hinuon, ilang gisultihan ang hari nga iyang himoon ang iyang kumingking nga mas baga kay sa balat-ang sa iyang amahan, nga dugangan ang ilang gipas-ang yugo ug kastigohon sila pinaagig mga tunokong panglapdos inay nga pinaagig mga latigo.​—1Ha 12:2-15; 2Cr 10:3-15; 13:​6, 7.

Kining arogante, malupigong tinamdan nga gipakita ni Rehoboam bug-os nagpahimulag sa kinabag-an sa katawhan. Ang mga tribo lamang nga nagpadayon sa pagpaluyo sa balay ni David mao ang Juda ug Benjamin, gawas sa mga saserdote ug mga Levihanon sa duha ka gingharian, maingon man ang pipila ka indibiduwal sa napulo ka tribo, nagpaluyo usab.​—1Ha 12:​16, 17; 2Cr 10:​16, 17; 11:​13, 14, 16.

Human niana, sa dihang si Haring Rehoboam ug Adoram (Hadoram), nga tigdumala sa mga gipaapil sa pinugos nga trabaho, miadto sa teritoryo niadtong mga mibulag, si Adoram gibato hangtod nga namatay apan ang hari nakahimo sa pagluwas sa iyang kinabuhi. (1Ha 12:18; 2Cr 10:18) Dayon gitigom ni Rehoboam ang 180,000 ka kasundalohan gikan sa Juda ug Benjamin, nga determinadong ipailalom ang napulo ka tribo sa pinugos nga paagi sa iyang pagmando. Apan si Jehova pinaagi sa manalagnang si Semaias nagpugong kanila sa pagpakig-away sa ilang mga igsoon, sanglit ang Diyos mismo ang naghukom sa pagkabahin sa gingharian. Bisan tuod nalikayan ang aktuwal nga panaggubatay, ang mga panag-away tali sa duha ka pundok nagpadayon sa tanang adlaw ni Rehoboam.​—1Ha 12:19-24; 15:6; 2Cr 10:19; 11:1-4.

Sa usa ka panahon si Rehoboam suod nga misunod sa mga balaod ni Jehova, ug sa sayong bahin sa iyang paghari iyang gitukod ug gipalig-on ang daghang siyudad, diin ang pipila niini iyang gipondohan ug mga abiyo sa pagkaon. (2Cr 11:5-12, 17) Apan sa dihang ang iyang pagkahari lig-on nang natukod, iyang gibiyaan ang pagsimba kang Jehova ug nanguna sa Juda sa pagbuhat sa dulumtanang pagsimba sa sekso, lagmit tungod sa Ammonhanong impluwensiya sa bahin sa pamilya sa iyang inahan. (1Ha 14:22-24; 2Cr 12:1) Kini, sa ingon, nakapukaw sa kasuko ni Jehova, ug sa pagpahayag niini siya nagpatindog sa hari sa Ehipto nga si Sisak, kinsa, kauban sa iyang mga kaalyado, bug-os nga nagpildi sa yuta ug nagbihag sa daghang siyudad sa Juda sa ikalimang tuig sa paghari ni Rehoboam. Kon wala pa magpaubos si Rehoboam ug ang iyang mga prinsipe pinaagi sa paghinulsol, bisan ang Jerusalem dili unta makalingkawas. Bisan pa niana, ang mga bahandi sa templo ug sa balay sa hari, lakip ang mga taming nga bulawan nga gihimo ni Solomon, gikuha ni Sisak ingong iyang inilog sa gubat. Dayon kini nga mga taming gipulihan ni Rehoboam ug mga taming nga tumbaga.​—1Ha 14:25-28; 2Cr 12:2-12.

Sa tibuok niyang kinabuhi si Rehoboam naminyo sa 18 ka asawa, lakip kang Mahalat nga usa ka apo ni David, ug kang Maaca nga apo sa anak nga lalaki ni David nga si Absalom. Si Maaca mao ang iyang pinanggang asawa ug ang inahan ni Abias (Abiam), nga usa sa iyang 28 ka anak nga lalaki ug ang manununod sa trono. Ang ubang mga membro sa pamilya ni Rehoboam naglakip sa 60 ka puyopuyo ug 60 ka anak nga babaye.​—2Cr 11:18-22.

Sa wala pa siya mamatay sa panuigong 58, ug sa pagpalingkod kang Abias sa trono niadtong  980 W.K.P, giaporan ni Rehoboam ug daghang gasa ang uban niyang mga anak nga lalaki, tingali aron sa pagsanta sa bisan unsang pag-alsa batok kang Abias human sa iyang kamatayon. (1Ha 14:31; 2Cr 11:23; 12:16) Sa katibuk-an, ang kinabuhi ni Rehoboam haom kaayong gisuma niini nga komentaryo: “Iyang gibuhat ang daotan, kay ang iyang kasingkasing wala niya ibutang nga lig-on sa pagpangita kang Jehova.”​—2Cr 12:14.