[Kang (Iya ni) Rekab].

Mga kaliwat ni Rekab nga Kenihanon pinaagi kang Jehonadab.​—Jer 35:6; 1Cr 2:55.

Sa panahon ni Jehonadab, mopatim-aw nga labing menos ang pipila sa mga Rekabita nagpuyo sa amihanang gingharian, kay didto man miduyog si Jehonadab kang Jehu (nga naghari niadtong mga 904-877 W.K.P.) sa pagsupak sa pagsimba kang Baal ug sa “tanan nga nahibilin nga iya ni Ahab sa Samaria.” (2Ha 10:15-17) Si Jehonadab nagsugo sa iyang pamilya (wala hisgoti kon kini nahitabo ba una pa o human sa iyang kasinatian uban kang Jehu) nga magpuyo sa mga tolda, dili magpugas ug binhi, dili magtanom ug mga parasan, ug dili moinom ug bino, tungod kay sila langyawng mga pumoluyo sa yuta.​—Jer 35:6-10.

Sa kataposang bahin sa paghari ni Jehoiakim (628-618 W.K.P.), ubay-ubay sa mga Rekabita ang namuyo sa Juda. Sa dihang misulong si Nabucodonosor sa yuta, ang mga Rekabita misulod sa Jerusalem aron mapanalipdan batok sa mga Caldeanhon ug mga Siryanhon. Pinaagi sa sugo ni Jehova, gidala ni Jeremias si Jaazanias nga ilang pangulo ug ang tanang Rekabita ngadto sa usa ka lawak-kan-anan sa templo. (Jer 35:1-4) Sanglit silang tanan paigo ra sa usa sa mga lawak-kan-anan sa templo, nagpasabot nga sila dili ra kaayo daghan. Si Jeremias, ingon sa gisugo sa Diyos, nagbutang ug mga kopa nga puno ug bino sa ilang atubangan ug miingon: “Inom kamo ug bino.” Sila midumili sa pag-inom agig pagsugot sa sugo sa ilang katigulangan, ug ilang gipatin-aw nga bag-o ra silang mibiya sa ilang naandang pinuy-anan ug misulod lamang sa siyudad tungod sa misulong nga kasundalohan.​—Jer 35:5-11.

Si Jehova nahimuot sa matinahorong pagsugot nga ilang gipakita. Ang ilang dili-matarog nga pagkamasinugtanon sa usa ka yutan-ong amahan sukwahi gayod sa pagkadili-masinugtanon sa mga taga-Juda sa ilang Maglalalang. (Jer 35:12-16) Ang Diyos misaad ug ganti sa mga Rekabita: “Dili mawad-an si Jonadab nga anak nga lalaki ni Rekab ug tawo nga mobarog kanunay sa akong atubangan.”​—Jer 35:19.

Sa panahon sa pagkagobernador ni Nehemias human sa pagkadestiyero, giayo ni “Malkias nga anak nga lalaki ni Rekab” ang Ganghaan sa mga Tapok sa Abo. Kon kini nga Rekab mao ra ang amahan o katigulangan ni Jehonadab, kini nagpakita nga ang mga Rekabita nakalingkawas gikan sa pagkadestiyero ug nakabalik sa yuta. (Neh 3:14) Sa 1 Cronicas 2:​55, si Hammat gitala ingong ang “amahan sa balay ni Rekab.”