1. Hari sa Sirya nga nagmando sa Damasco sulod sa yugto sa paghari ni Haring Jotam (777-​762 W.K.P.) sa Juda ug sa iyang anak nga lalaking si Haring Ahaz (kansang paghari natapos niadtong 746 W.K.P.).

Dayag nga sa hapit nang matapos ang paghari ni Jotam nga si Rezin miduyog kang Peka nga hari sa Israel sa pagpakiggubat sa Juda. (2Ha 15:36-38) Sa panahon sa maong mga pagpakiggubat, nga nagpadayon hangtod sa paghari ni Ahaz, ang mga Siryanhon, dayag nga ubos sa pagmando ni Rezin, nagbihag sa daghang Judeanhon ug nagdala kanila ngadto sa Damasco. (2Cr 28:5) Dugang pa, giilog ni Rezin gikan sa Juda ang siyudad sa Elat duol sa Gulpo sa ʽAqaba, nga nagpapahawa sa mga Hudiyo ug nagbalik sa siyudad ngadto sa mga Edomhanon. (2Ha 16:6) Ang nahiusang Siro-Israelinhong kasundalohan milikos sa Jerusalem, nga nagtinguha sa paghimo sa “anak nga lalaki ni Tabeel” nga hari niini, apan wala nila mailog ang siyudad. (2Ha 16:5; Isa 7:​1, 6) Ang maong kahimtang nakapahadlok pag-ayo kang Ahaz, bisan pa sa pasalig ni Isaias nga dili angayng kahadlokan si Rezin sa Sirya ug si Peka sa Israel. (Isa 7:3-12; 8:​6, 7) Si Ahaz midangop sa Asirya alang sa tabang, nga naghiphip kang Tiglat-pileser III aron sa pag-atake sa Sirya.​—2Ha 16:​7, 8; 2Cr 28:​16, 20.

Si Tiglat-pileser III nakiggubat sa Damasco, nga nagbihag niini ug nagpatay kang Rezin. Busa ang Sirya nailalom sa pagmando sa Asirya.​—2Ha 16:9.

2. Ang amahan sa usa ka banay sa mga Netinim, nga ang pipila kanila namalik sa Jerusalem gikan sa Babilonya niadtong 537 W.K.P.​—Esd 2:​1, 43, 48; Neh 7:​6, 46, 50.