[Gipainit nga Bato; o, Nagbaga nga Uling].

Usa ka puyopuyo ni Haring Saul; anak nga babaye ni Aia. (2Sa 3:7; 21:11) Human sa kamatayon ni Saul, ang iyang anak nga lalaki nga si Is-boset nasilag kang Heneral Abner ug gipapanubag niya kini tungod sa pagpakigdulog kang Rizpa, usa ka buhat nga iyang giisip ingong pag-ilog sa trono. Tungod niana, si Abner mitalikod aron sa pagdapig kang David.​—2Sa 3:7-21.

Si Rizpa nanganak ug duha ka anak nga lalaki kang Saul, si Armoni ug Mepiboset. Paglabay sa dugayng panahon human sa kamatayon ni Saul, gikuha ni David kining duha ka anak nga lalaki ni Rizpa uban sa lima pa ka ubang kaliwat ni Saul ug gihatag sila sa mga Gabaonhon aron pamatyon, aron mawala ang pagkasad-an sa dugo gikan sa yuta. Ang pito giladlad didto ibabaw sa bukid, diin si Rizpa nagbantay sa ilang mga lawas gikan sa mga langgam ug sa ihalas nga mga mananap “sukad sa pagsugod sa ting-ani hangtod sa pagbundak sa tubig kanila gikan sa kalangitan.” (2Sa 21:1-10) Kining wala matinong yugto sa panahon lagmit maoy lima o unom ka bulan, gawas lamang kon, sumala sa gihunahuna sa pipila, dihay nahitabong talagsaon nga pagbundak sa ulan nga wala sa panahon niini. Ang maong kusog nga ulan una pa ang Oktubre talagsaon gayod. (1Sa 12:​17, 18; Pr 26:1) Sa kataposan nadungog ni David ang maong butang ug nahunong na ang pagbantay ni Rizpa sa dihang iyang gipalubong ang mga lawas.​—2Sa 21:11-14.