Gitala ingong usa sa upat ka anak nga lalaki ni Javan diha sa 1 Cronicas 1:7. Dili matino ang hustong espeling sa maong ngalan sanglit sa Masoretikong teksto sa 1 Cronicas 1:7 ang mabasa maoy “Rodanim,” samtang sa daghang Hebreohanong mga manuskrito ug sa Latin nga Vulgate ang mabasa dinhi maoy “Dodanim.” Ang “Dodanim” makita usab diha sa Masoretikong teksto sa Genesis 10:​4, apan niining tekstoha sa Gregong Septuagint ug sa Samarianhong Pentateuch mabasa kini nga “Rodanim.” Sa Hebreohanon ang letrang “r” (ר) ug ang letrang “d” (ד) susama kaayo ug busa mahimong mabaylo sa usa ka magkokopya. (Busa ang “Ripat” sa Gen 10:3 makita nga “Dipat” sa 1Cr 1:6 diha sa Masoretikong teksto.) Ang kadaghanang hubad naggamit sa duha ka ngalan. Apan gipalabi sa daghang leksikograpo ang espeling nga “Rodanim.” Ang mga komentarista nga midawat niini nga espeling o hubad naghunahuna nga lagmit ang katawhang naggikan niini nga anak ni Javan mao gayod ang namuyo sa pulo sa Rodas ug sa silingang kapuloan sa Dagat Aegean.