Ang Hebreohanong termino nga gihubad nga sagradong haligi sa paninugdan nagtumong sa usa ka butang nga gipahiluna o gipatindog. Dayag nga kini maoy pormag kinatawo sa lalaki nga simbolo ni Baal o, usahay, sa ubang bakak nga mga diyos. (Ex 23:24; 2Ha 3:2; 10:27) Sa lainlaing mga dapit sa Tungang Sidlakan, nakaplagan ang nagtindog nga mga haligi nga bato nga dili matino kon unsay estruktural nga gamit niini. Ang pagkadiskobre niini lakip sa karaang mga butang nga gigamit sa relihiyosong paagi nagpaila nga kini maoy sagradong mga haligi. Ang pipila niini dili sinapsapan ug may gihabogong 1.8 m (6 p) o kapin pa.

Sa wala pa mosulod sa Yutang Saad, ang mga Israelinhon gisugo nga dili magpatindog ug bisan unsang sagradong mga haligi ug gisugo sa pagtumpag o pagdugmok sa naglungtad na nga sagradong mga haligi sa mga Canaanhon. (Ex 34:13; Lev 26:1; Deu 12:3; 16:22) Ang paagi sa paglumpag niini nga mga haligi nagpakita nga kini lagmit maoy ginama sa bato. Apan sa 2 Hari 10:​26, gihisgotan ang pagsunog sa sagradong mga haligi, nga nagpasabot nga ang uban maoy ginama sa kahoy. Hinuon, niini nga kahimtang, ang paghisgot lagmit nagtumong sa sagradong poste, o Asera.​—Tan-awa ang SAGRADONG POSTE.

Gisalikway sa Israel ang tin-awng mga pasidaan sa Diyos nga gihatag pinaagi kang Moises. Ang teritoryo sa gingharian sa Juda ug nianang sa napulo-ka-tribong gingharian napuno sa sagradong mga haligi. (1Ha 14:​22, 23; 2Ha 17:10) Apan ang matinumanong mga hari sa Juda, sama kang Asa, Ezequias, ug Josias, nagdugmok sa sagradong mga haligi (2Ha 18:4; 23:14; 2Cr 14:3), ug sa dihang si Jehu naghanaw sa pagsimba kang Baal gikan sa napulo-ka-tribong gingharian, gitumpag ang sagradong haligi ni Baal.​—2Ha 10:​27, 28.